TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryeministri i Spanjës, Pedro Sánchez, i ka dërguar një letër institucioneve të Bashkimit Europian ku shpreh shqetësimin për reagimet e disa qeverive europiane ndaj krizës së emigrantëve në enklavën spanjolle të Ceutës.
Në letrën, të siguruar nga agjencia italiane e lajmeve ANSA, Sánchez kërkon organizimin urgjent të një takimi të ministrave të Brendshëm të 27 vendeve anëtare të BE-së, me qëllim hartimin e një “përgjigjeje të përbashkët” ndaj situatës së krijuar.
Kreu i qeverisë spanjolle thekson se menaxhimi i kufijve të jashtëm të Bashkimit Europian nuk duhet të jetë vetëm përgjegjësi e vendeve që ndodhen në vijën e parë të presionit migrator.
“Siguria e kufijve tanë të jashtëm është një përgjegjësi e përbashkët e të gjitha vendeve anëtare dhe jo vetëm e atyre që ndodhen në vijën e parë të Bashkimit Europian”, thuhet në mesazhin e Sánchez.
Ai kërkoi një angazhim më të madh të institucioneve europiane për menaxhimin e krizës dhe një koordinim më të fortë mes vendeve anëtare për përballimin e flukseve të emigrantëve.
Situata në Ceuta është përshkallëzuar ndjeshëm, pasi sipas autoriteteve rreth 60 mijë emigrantë dyshohet se kanë kaluar kufirin nga territori maroken brenda 24 orëve të fundit. Presidenti i enklavës spanjolle, Juan Jesús Vivas, e cilësoi situatën si një krizë të paprecedentë.
Nga personat që kanë hyrë në Ceuta, të paktën 7 mijë janë të mitur dhe ndodhen nën kujdesin e autoriteteve lokale. Ndërkohë, numri i viktimave gjatë përpjekjeve për të kaluar kufirin përmes detit ka kaluar mbi 60 persona.
Vivas e krahasoi përmasën e krizës me një skenar ekstrem, duke deklaruar se “është njësoj sikur në Spanjë të hynin 34 milionë persona brenda 24 orëve”.
Sipas autoriteteve spanjolle, dhjetëra mijëra emigrantë janë kthyer tashmë në Marok. Qeveria e Madridit ka bërë të ditur se më shumë se 37 500 persona janë rikthyer në territorin maroken, ndërsa më shumë se 48 mijë emigrantë raportohet se janë kthyer në total.
Shumë prej personave që kanë kaluar në Ceuta kanë deklaruar se përballen me kushte të vështira për shkak të mbipopullimit, mungesës së strehimit dhe pamundësisë për të qëndruar në enklavën spanjolle.
