TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Të paktën 57 persona kanë humbur jetën gjatë përpjekjes për të hyrë nga Maroku në enklavën spanjolle të Ceutës, ndërsa rreth 50 mijë emigrantë kaluan kufirin brenda vetëm 24 orëve, duke shkaktuar një nga krizat më të mëdha migratore të viteve të fundit.
Kryeministri spanjoll Pedro Sánchez e cilësoi situatën si një “shkelje të integritetit territorial të Spanjës”, duke akuzuar rrjetet kriminale të trafikimit të qenieve njerëzore për organizimin e kalimeve masive.
Sipas autoriteteve, fluksi i emigrantëve mbingarkoi qytetin me rreth 85 mijë banorë, ndërsa mijëra persona, përfshirë edhe fëmijë të pashoqëruar, mbetën të strehuar në parqe dhe në rrugë.
Qeveria spanjolle bëri të ditur se më shumë se 48 mijë persona janë kthyer vullnetarisht në Marok. Ndërkohë, në Ceuta janë dislokuar forca shtesë të policisë dhe ushtrisë për të rikthyer kontrollin në kufi.
Sipas raportimit të The Guardian, Sánchez njoftoi se do të ngrihet një qendër e përkohshme pritjeje për regjistrimin, identifikimin dhe përshpejtimin e procedurave të dëbimit për personat që nuk kanë të drejtë ligjore të qëndrojnë në Spanjë. Gjithashtu, autoritetet do të vendosin një barrierë me bova në det pranë plazhit Tarajal për të shënuar qartë vijën kufitare.
Kriza ka shkaktuar edhe përplasje politike brenda Bashkimit Evropian. Italia kërkoi pezullimin e përkohshëm të Spanjës nga zona Schengen, duke argumentuar se politika migratore e Madridit ka nxitur trafikimin e emigrantëve.
Qeveria spanjolle e kundërshtoi ashpër këtë qëndrim, ndërsa Komisioni Evropian sqaroi se Ceuta dhe Melilla gëzojnë një regjim të veçantë brenda zonës Schengen dhe se nuk ekziston rreziku i lëvizjes së lirë të emigrantëve drejt pjesës tjetër të Evropës.
Ndërkohë, presidenti i Këshillit Evropian, António Costa, dhe presidenti francez Emmanuel Macron shprehën solidaritet me Spanjën. Bashkimi Evropian ka thirrur një mbledhje urgjente për të koordinuar përgjigjen ndaj krizës.
Autoritetet spanjolle e konsiderojnë situatën një krizë të rëndë humanitare. Shumë prej viktimave u mbytën në det, ndërsa të tjerë humbën jetën gjatë përplasjes në pikën kufitare të Tarajalit. Hetimet për zbardhjen e plotë të rrethanave të ngjarjes janë ende në vijim.
