TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një burrë në Japoni ka kthyer një orë luksoze që kishte vjedhur disa ditë më parë, duke i bashkëngjitur një letër kërkimfaljeje. Megjithatë, policia vijon kërkimet për identifikimin dhe arrestimin e tij.
Vodhi një orë luksoze me vlerë mbi 260 mijë euro, por disa ditë më vonë vendosi ta kthente, madje duke kërkuar edhe falje. Kjo është historia e pazakontë që ka ndodhur në Tokio të Japonisë, ku një burrë u largua nga një dyqan me orën që kishte kërkuar ta provonte, ndërsa më 1 nëntor ajo u kthye në dyqan brenda një pakoje, së bashku me një letër kërkimfaljeje të shkruar me dorë.
Sipas mediave japoneze, ngjarja ndodhi javën e kaluar në zonën Nakano të Tokios. Burri hyri në një dyqan orësh luksoze duke u shtirur si klient dhe kërkoi të provonte një orë të markës zvicerane Audemars Piguet, me vlerë 46 milionë jen. Por pasi e mori në dorë, në vend që t'ia kthente shitësit, u largua nga dyqani duke e marrë me vete.
Disa ditë pas vjedhjes, më 1 nëntor, në dyqan mbërriti një pako me orën e vjedhur. Brenda saj ndodhej edhe një letër e shkruar me dorë, përmes së cilës autori kërkonte falje për veprimin e tij.
Sipas gazetës japoneze “Asahi Shimbun”, hetuesit verifikuan numrin serial të orës dhe konfirmuan se bëhej fjalë për të njëjtën orë që ishte vjedhur.
Megjithatë, kthimi i orës dhe kërkimfalja nuk e kanë mbyllur çështjen. Policia e Tokios vijon kërkimet për të identifikuar dhe arrestuar personin që kreu vjedhjen.
