TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Drejtoresha e Agjencisë Shtetërore të Kadastrës, Lorena Goxhobelli, ka bërë të ditur se 697 kulla të vjetra në të gjithë Shqipërinë pritet të formalizohen, ndërsa poseduesit e tyre do të pajisen me Certifikatë Pronësie.
Deklarata u bë gjatë takimit të zhvilluar sot në Theth me kryeministrin Edi Rama, ku në fokus ishte ligji për “Paketën e Maleve”.
Goxhobelli tha se vetëm në Theth janë identifikuar 15 kulla të vjetra, për të cilat ka nisur procesi i formalizimit. Sipas saj, në të gjithë Drejtorinë e Shkodrës janë rreth 194 kërkesa që po procedohen për marrjen e titullit të pronësisë.
Sipas drejtoreshës së Kadastrës, formalizimi i pronësisë përbën një parakusht për zbatimin e “Paketës së Maleve”, por edhe për procese të tjera që lidhen me regjistrimin e titujve të pronësisë.
Ajo theksoi se kjo paketë nuk është vetëm një ligj për pronësinë, por një ligj zhvillimi, i cili synon rijetëzimin e zonave malore përmes formalizimit të pronës dhe nxitjes së investimeve.
“Sa i përket rijetëzimit të kullave, jemi në një projekt me Ministrinë e Turizmit dhe GIZ, ku kemi identifikuar 697 kulla të vjetra. Po vijojmë procesin e titujve të pronësisë. Vetëm për Thethin janë 15 kulla të identifikuara, për të cilat po vijon procesi i formalizimit. E gjithë drejtoria e Shkodrës ka rreth 194 kërkesa që po procedohen nga ana jonë për të marrë titullin e pronësisë”, deklaroi Goxhobelli.
Ajo shpjegoi se “Paketa e Maleve” përbëhet nga dy komponentë kryesorë: formalizimi i të drejtës së pronësisë dhe incentivat fiskale për zhvillimin e zonave malore.
Procesi nis me një shprehje interesi, vijon me verifikim në terren nga bashkia dhe më pas me miratimin nga Këshilli Bashkiak të listës së pronarëve joposedues.
Hapat e mëtejshëm janë kryesisht administrativë dhe lidhen me mundësinë e aplikimit për leje zhvillimi. I gjithë procesi koordinohet mes bashkive dhe Agjencisë Shtetërore të Kadastrës, për verifikimin e statusit ligjor të zonave të përcaktuara si zona të zhvillimit të ekonomisë malore.
