AKTUALITET, 25 Nëntor 2021, 20:46

Nga marrëveshjet mes dy vendeve tek dialogu me Serbinë, Presidenca zbardh takimin e Metës me Osmanin: Konsolidim i bashkëpunimit rajonal

Nga marrëveshjet mes dy vendeve tek dialogu me Serbinë, Presidenca

Presidenti i Republikës, Ilir Meta u prit sot në një takim nga Presidentja e Kosovës, Vjosa Osmani, me të cilën ndanë urimet për festën kombëtare të 28 Nëntorit, Ditën e Flamurit.

Të dy Presidentët zhvilluan një bisedë të hapur për mundësitë e thellimit të marrëdhënieve strategjike dhe vëllazërore mes dy vendeve tona, në të gjitha fushat, si dhe për konsolidimin e bashkëpunimit rajonal në kuadër edhe të nismave rajonale gjithëpërfshirëse, në mënyrë të veçantë të Procesit të Berlinit.

“U vlerësua me shumë rëndësi forcimi i bashkëpunimit në fushën e politikës së jashtme, të sigurisë, si dhe për angazhimin e përbashkët në projekte infrastrukturore, me impakt të rëndësishëm në zhvillimet ekonomike e sociale për të dy vendet tona.

Presidenti Meta dhe Presidentja Osmani ndanë të njëjtin mendim mbi nevojën jetike, që marrëveshjet ndërqeveritare që janë finalizuar e do të nënshkruhen, të konkretizohen në praktikë, për t’i shërbyer në mënyrë thelbësore forcimit të bashkëpunimit në çdo aspekt, si dhe përmirësimit të jetës së qytetarëve tanë”, thuhet në njoftimin e Presidencës.

Po ashtu Presidenti Meta theksoi domosdoshmërinë e përshpejtimit të dialogut Kosovë-Serbi, me qëllim finalizimin sa më parë të një marrëveshjeje përfundimtare për njohjen reciproke të dy vendeve.