AKTUALITET, 2 Qershor 2023, 14:47

Çfarë po ndodh me monedhën europiane?! Euro kap një tjetër rekord historik. Ja faktorët që ndikojnë në uljen e vlerës së saj

Çfarë po ndodh me monedhën europiane?! Euro kap një

Prej disa muajsh monedha euro në vendin po zhvlerësohet. Sot monedha europiane po njeh rekorde të reja në këmbimin me lekun vendas duke kapur një tjetër rekord historik. Sipas kursit zyrtar të këmbimit të Bankës së Shqipërisë, monedha europiane u këmbye këtë të premte me me 108.73 lekë, në rënie me 0.67 krahasuar me një ditë më parë.

Sipas agjentëve të këmbimit, oferta e monedhës europiane këtë vit paraqitet shumë e lartë. Fillimi i sezonit turistik besohet t’i ketë rritur edhe më shumë këto prurje por bazuar në tendencat historike piku i hyrjeve valutore duhet ende të vijë deri në fillim të muajit gusht.

Zhvlerësimi i euros në raport me lekun po favorizon gjithnjë e më shumë ato subjekte që kanë shpenzime në euro dhe të ardhura në lekë ku përfshihen sidomos importuesit, qeveria shqiptare dhe huamarrësit e tjerë privatë.

Dy ditë më parë guvernatori i Bankës së Shqipërisë, Gent Sejko përforcoi qëndrimin e tij se luhatjet në kursin e këmbimit janë efekt i flukseve të euros që janë në qarkullim. Pra më shumë të ardhura nga turizmi dhe dërgesat e emigrantëve.