TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gjykata Speciale në Hagë pritet të marrë më 14 korrik një nga vendimet më të rëndësishme në procesin gjyqësor kundër ish-krerëve të Ushtrisë Çlirimtare të Kosovës: Hashim Thaçi, Kadri Veseli, Rexhep Selimi dhe Jakup Krasniqi. Paneli gjykues i kryesuar nga Charles Smith ka bërë të ditur se synon të vendosë pikërisht atë ditë nëse aktakuza e ngritur ndaj tyre do të qëndrojë në fuqi apo do të rrëzohet.
Afati i fundit për dorëzimin e mocionit të përbashkët nga ekipet mbrojtëse është vendosur më 12 qershor. Avokatët e katër të akuzuarve – Misetiq, Dixon, Roberts dhe Alagendra – do të paraqesin argumentet e tyre për rrëzimin e aktakuzës, të cilën e konsiderojnë të pabazë dhe të ndërtuar mbi fakte të brishta.
Ndërkohë, Prokuroria e Specializuar, e udhëhequr nga Kimberly West, ka afat deri më 7 korrik për të kundërshtuar kërkesën e mbrojtjes dhe për të paraqitur arsyet pse duhet të mbetet në fuqi aktakuza që ngarkon të pandehurit me krime lufte dhe krime kundër njerëzimit.
Vendimi i 14 korrikut pritet të përcaktojë rrjedhën e mëtejshme të procesit: në rast se aktakuza rrëzohet, mund të kemi një kthesë të madhe në drejtim të lirimit të ish-krerëve të UÇK-së. Në të kundërt, nëse qëndron në fuqi, atëherë procesi do të vijojë me dëgjimin e dëshmive të para nga Mbrojtësi i Viktimave dhe më pas nga mbrojtja.
Sipas kalendarit aktual, ekipet mbrojtëse duhet të deklarojnë më 16 korrik nëse do të paraqesin rastin e tyre gjatë vjeshtës dhe nëse do të thërrasin dëshmitarë në sallën e gjykimit.
Ky është një moment kyç për drejtësinë ndërkombëtare, por edhe për vetë Kosovën, pasi rezultati i këtij vendimi mund të ketë ndikime të mëdha politike, morale dhe historike për imazhin e luftës çlirimtare dhe të shtetësisë së Kosovës.
