TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ballkani po përballet me një valë të fortë të nxehti dhe thatësire, ndërsa në Serbi niveli i lumit Danub ka rënë në pikën më të ulët të regjistruar në më shumë se gjysmë shekulli.
Autoritetet meteorologjike kanë paralajmëruar temperatura deri në 40 gradë Celcis, të cilat pritet të zgjasin për rreth dy javë.
Mungesa e reshjeve ka bërë që në shumë zona të shfaqen brigje rëre dhe pjesë të lumit të jenë aq të cekëta sa mund të kalohen në këmbë.
Në qytetin e Novi Sadit, banorët thonë se nuk mbajnë mend ta kenë parë ndonjëherë Danubin në një gjendje kaq kritike.
Për shkak të tërheqjes së ujit janë krijuar plazhe të improvizuara, ku banorët vendosin çadra dhe peshqirë për t’u freskuar.
Në të njëjtën kohë, lundrimi në lumë është kufizuar ndjeshëm.
Anijet turistike që zakonisht sjellin mijëra vizitorë kanë anuluar udhëtimet, ndërsa vetëm disa varka peshkimi vazhdojnë të lëvizin me kujdes në kanalet e cekëta.
Sipas Shërbimit Hidrometeorologjik të Serbisë, në zonën e Bezdanit, pranë kufirit me Kroacinë dhe Hungarinë, Danubi ka arritur nivelin më të ulët të regjistruar në mbi 50 vjet.
Ekspertët paralajmërojnë se kjo situatë e pafavorshme hidrologjike mund të vazhdojë gjatë gjithë muajit gusht dhe të prekë edhe lumenj të tjerë të vendit.
Ata paralajmërojnë se rënia e nivelit të ujit ul edhe përqendrimin e oksigjenit në lumenj, duke rrezikuar peshqit dhe ekosistemet ujore.
Thatësira po krijon shqetësime edhe për furnizimin me ujë. Me rezervat e ujërave nëntokësore në nivele të ulëta, fermerët që mbështeten te sistemet e ujitjes mund të përballen me mungesa serioze në kulmin e sezonit bujqësor.
Autoritetet po monitorojnë situatën, pasi nëse temperaturat e larta vazhdojnë, problemet mund të shtrihen edhe në furnizimin me ujë të pijshëm në disa zona.
Ndikimi po ndihet edhe në sektorin energjetik.
Hidrocentrali më i madh i Serbisë funksionon aktualisht me rreth një të tretën e kapacitetit të zakonshëm për shkak të prurjeve të ulëta të ujit.
Megjithatë, kompania shtetërore e energjisë ka deklaruar se furnizimi me energji elektrike nuk është ende në rrezik.
Transporti lumor është një tjetër sektor i goditur rëndë. Importet e karburantit përmes Danubit janë ulur ndjeshëm, pasi maunat mund të ngarkohen vetëm me 30–40% të kapacitetit të tyre.
Në portin e Prahovos, një nga portet më të rëndësishme lumore të Serbisë, aktiviteti është reduktuar pothuajse në minimum, me ditë të tëra pa mbërritur asnjë anije mallrash për shkak të nivelit shumë të ulët të ujit.
Shkencëtarët theksojnë se valët e shpeshta të të nxehtit dhe periudhat e gjata të thatësirës janë bërë më intensive si pasojë e ndryshimeve klimatike të shkaktuara nga aktiviteti njerëzor.
Ata paralajmërojnë se fenomene të tilla do të bëhen gjithnjë e më të zakonshme në Evropë, duke ushtruar presion mbi burimet ujore, bujqësinë, prodhimin e energjisë dhe transportin, ndërsa vendet e rajonit do të duhet të përshtaten me një klimë gjithnjë e më ekstreme.
