TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Në Gjykatën Themelore në Prishtinë është mbajtur seanca e radhës ndaj vëllezërve Dragisha dhe Jovan Viqentijeviq, si dhe Igor Dimoviqit, të akuzuar për sulmin ndaj kanalit të “Ibër-Lepencit”. Gjatë seancës dëshmoi Ernest Kërçeli, drejtor i Infrastrukturës në “Ibër-Lepenc” dhe përfaqësues i palës së dëmtuar. Ai deklaroi se dëmi i shkaktuar nga sulmi arrin në rreth 370 mijë euro.
Prokuroria Speciale e Kosovës i akuzon të tre të pandehurit për armëmbajtje pa leje, ndërsa ndaj vëllezërve Viqentijeviq janë ngritur edhe akuza për “prishje të rendit kushtetues përmes shkatërrimit apo dëmtimit të instalimeve dhe pajisjeve publike”, “kryerje të veprës terroriste” dhe “spiunazh”.
Sipas aktakuzës së ngritur më 9 dhjetor të vitit të kaluar, tre të pandehurit dyshohen për përfshirje në shpërthimin e ndodhur më 29 nëntor 2024 në fshatin Varagë të Zubin-Potokut, në veri të Kosovës.
Në aktakuzë thuhet se Jovan Viqentijeviq ka deklaruar para prokurorisë se ishte trajnuar në një poligon të ushtrisë serbe së bashku me rreth 120 persona të tjerë, gjatë periudhës 14-23 shtator 2023. Sipas Prokurorisë Speciale, këto trajnime janë zhvilluar në të njëjtën periudhë kur, sipas akuzave për sulmin në Banjskë, grupi i udhëhequr nga Milan Radoiçiq kishte kryer stërvitje në poligonin “Pasulanske Livade”.
Në dëshminë e tij para prokurorisë, Viqentijeviq ka pretenduar gjithashtu se në Kosovë ishte planifikuar një tjetër sulm në tetor të vitit të kaluar, por ai ishte anuluar me urdhër të Radoiçiqit. Sipas deklarimeve të përfshira në aktakuzë, për këtë veprim ishte pritur përfundimi i zgjedhjeve presidenciale në Shtetet e Bashkuara dhe fitorja e Donald Trumpit. Këto pretendime janë pjesë e materialeve të hetimit dhe pritet të shqyrtohen gjatë procesit gjyqësor.
Procesi gjyqësor ndaj të pandehurve vijon në Gjykatën Themelore në Prishtinë.
