AKTUALITET, 14 Korrik 2024, 09:53

Atentati ndaj Trump, Meta: U sulmua për shkak të ideve dhe vizionit të tij për të bërë Amerikën sërish të madhe

Atentati ndaj Trump, Meta: U sulmua për shkak të ideve dhe vizionit

Presidenti i Partisë së Lirisë, Ilir Meta ka dënuar sulmin me armë ndaj ish-Presidentit të SHBA-ve Donald Trump. Me anë të një postimi në rrjetet sociale, Meta thotë se u bashkohet lutjeve për familjet që humbën të dashurit dhe uron shërimin sa më të shpejtë për Trump.

Ai ka shtuar se Donald Trump u plagos për shkak të ideve dhe vizionit të tij për të bërë Amerikën sërish të madhe.

“Dënoj me ashpërsinë më të madhe sulmin me armë ndaj Presidentit Trump, i cili për fat të mirë i shpëtoi atentatit në Pensilvani, që fatkeqësisht shkaktoi dhe viktima të pafajshme.

U bashkohem lutjeve për familjet që humbën të dashurit dhe për shërimin sa më të shpejtë të Presidentit Trump, i cili mori një plumb për shkak të ideve dhe vizionit të tij për të bërë Amerikën sërish të Madhe.

Solidaritetin e plotë me Presidentin Trump, të cilit i uroj sa më parë të rikthehet edhe më i fortë në betejën e tij të pandalshme për mbrojtjen e vlerave të SHBA dhe kombit mik amerikan”, shkruan Meta.