TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
AKSHI ka reaguar pas publikimit të një artikulli që vë në dyshim mënyrën se si funksionon Diella, duke pretenduar se nuk është identifikuar një sistem i Inteligjencës Artificiale që qëndron pas saj. Agjencia Kombëtare e Shoqërisë së Informacionit i cilëson pretendimet që ngrihen në artikull si të pasakta dhe thotë se analiza është bërë vetëm mbi pjesën e sistemit që është e dukshme për përdoruesit.
Sipas AKSHI-t, faqja ku qytetarët shohin dhe komunikojnë me Diellën është vetëm ndërfaqja, ndërsa sistemi i Inteligjencës Artificiale që përpunon kërkesat funksionon në infrastrukturën e brendshme qeveritare.
Agjencia argumenton se adresat e serverëve, çelësat dhe elementë të tjerë të backend-it nuk duhet të jenë të dukshëm në kodin publik pikërisht për arsye sigurie dhe se mungesa e tyre vetëm në sytë e publikut, sipas saj, nuk provon se Diella nuk ka një sistem AI pas saj.
AKSHI thotë se Diella është në shërbim në portalin e-Albania që prej janarit 2025, është zhvilluar në bashkëpunim me Microsoft duke përdorur modele të OpenAI në Azure dhe deri tani ka vulosur elektronikisht mbi 120 mijë dokumente zyrtare.
Sqarimi i plotë i AKSHI-t lidhur me pasaktësitë e publikuara mbi funksionimin e Diellës
Në respekt të informimit të saktë të publikut, AKSHI sqaron disa pasaktësi teknike të publikuara së fundmi lidhur me Diellën dhe mënyrën e funksionimit të saj. Faqja që sheh përdoruesi është ndërfaqja e sistemit, jo vetë sistemi. Kur një qytetar i kërkon Diellës një dokument, kërkesa përpunohet në infrastrukturën qeveritare, ku funksionon sistemi i inteligjencës artificiale i zhvilluar nga AKSHI në bashkëpunim me Microsoft, duke përdorur modele të OpenAI në Azure.
Faqja është ajo që shihet; sistemi që kryen punën ndodhet pas saj. Pikërisht për arsye sigurie, një sistem i ndërtuar sipas standardeve nuk ekspozon në kodin publik adresat e brendshme të serverëve, kredencialet apo çelësat sekretë. Fakti që këto elemente nuk gjenden në kodin e faqes nuk provon mungesën e sistemit; përkundrazi, tregon zbatimin e masave bazë të sigurisë. Po ashtu, emërtime të përgjithshme adresash në internet, si “aibot-api”, nuk kanë qenë dhe nuk janë pjesë e sistemit të Diellës apo e infrastrukturës së AKSHI-t. Për rrjedhojë, sjellja ose përgjigjja e tyre nuk mund të përdoret si tregues për funksionimin apo mosfunksionimin e Diellës. Analizimi vetëm i kodit të ndërfaqes publike nuk mund të përcaktojë arkitekturën, modelet apo logjikën që funksionon në backend.
Faktet mbi Diellën janë konkrete dhe të verifikueshme:
-Në shërbim brenda portalit e-Albania që prej janarit 2025;
-Mbi 120,000 dokumente zyrtare të vulosura elektronikisht, numër që vijon të rritet;
-E zhvilluar nga AKSHI në bashkëpunim me Microsoft, duke përdorur modele të OpenAI në Azure;
-Sistemi operon me mekanizma të dedikuar logimi dhe monitorimi.
Një imazh, një avatar apo një faqe statike nuk mund të përpunojë dhe të vulosë dokumente zyrtare. AKSHI mbetet i hapur ndaj analizës, pyetjeve dhe debatit profesional. Kritika është e mirëpritur kur mbështetet në fakte dhe metoda që mund të provojnë përfundimet e pretenduara. Informimi i saktë i publikut është një përgjegjësi që na përket të gjithëve.
