TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Sprinti i një “bilete” për Ligën e Kampioneve 2023-’24 kalon nëpër Romë.
Para se të shikohet Euroderbi me Interin, Milani do të duhet të kapërcejë pa dëme duelin direkt me verdhekuqtë e Zhoze Murinjos. “Një ndeshje që vlen dyfish”, siç nënvizoi Stefano Pioli dhe në të cilën ‘djalli’ do të duhet të japë përgjigje për t’u shëruar nga alergjia e transfertës.
TREND NEGATIV – Sezonin e kaluar, kuqezinjtë kishin ndërtuar një pjesë të mirë të titullit larg “San Siro”-s, me një ecuri të pandalshme. Shifrat e sivjetshme kanë ndryshuar për keq dhe faktori trengjyrësh është kthyer në pikë të dobët. Në 10 ndeshjet e fundit jashtë fushe në Seria A, djemtë e Piolit kanë arritur vetëm tri fitore: “poker” në Maradona kundër Napolit, 1-0 të firmosur nga Mesias në Monza dhe 2-1 kundër Salernitanës, në ndeshjen e parë të këtij viti kalendarik.
NË NDJEKJE – Duke parë renditjen aktuale duhet thënë se performancat jashtë fushe nuk janë të denja për Ligën e Kampioneve. Në kampionat, Milani ka fituar 23 pikë jashtë shtëpisë në 16 ndeshje (mesatarisht 1.44) dhe është në vendin e pestë, pas Napolit (43), Lacios (31), Atalantës (28) dhe Romës (25). Juve dhe Inter, i gjashti (23) dhe i teti (21) me një ndeshje më pak në transfertë, mund të kalojnë Milanin në ndeshjet e kësaj jave. Larg “San Siro”-s, kuqezinjtë kanë marrë gjithsej 6 fitore, 5 barazime dhe 5 humbje me 20 gola të pësuar dhe 21 të shënuar. Vështirësi edhe në Europë, ku suksesi erdhi vetëm me 4-0 në Zagreb, në ndeshjen e parafundit të grupit.
NË PASQYRË – Lidhja me sezonin e kaluar është e menjëhershme. Në sezonin 2021/ ’22, Milani ishte fokusuar në sprintin e titullit, me një marsh monstruoz të karakterizuar nga 46 pikë në 19 ndeshje (14 fitore, 4 barazime dhe vetëm një humbje, 4-3 kundër Fiorentinës). Vetëm pak muaj më parë, paraqitja e shkëlqyer e sulmit (41 gola) dhe mbrojtjes (19 gola të pësuar, shifër e barazuar tashmë në mars), kishte vulosur mesataren më të mirë të pikëve në transfertë në Serinë A (2.42).
Megjithatë, në krahasimin e sezonit të titullit, kuqezinjtë shënuan paraqitje pak më negative në shtëpi. Nëse sezoni i kaluar përfundoi me 40 pikë të grumbulluara në “San Siro” dhe një mesatare prej 2.11 për ndeshje, ajo aktuale është 2.20. Për të bërë një kthesë krahasuar në finalen e sezonit dhe për të kapur kualifikimin e tretë radhazi në Ligën e Kampioneve, Pioli do të duhet të zgjidhë problemin e transfertave: një nga mundësitë e fundit për ta bërë këtë do të vijë të shtunën në “Olimpico”, kur do të përballet me Romën. Ndoshta duke menduar për dy sukseset radhazi, në dy ndeshjet e fundit me pamje nga Koloseu, kundër verdhekuqve.
