TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Me mjaft interes po priten këtë të diel edhe zgjedhjet në Turqi. 64 milionë votues me të drejtë vote kanë hedhur votën e tyre për të zgjedhur një president dhe parlament për një mandat 5-vjeçar. Sipas të dhënave të 82.5% të qendrave të votimit duket se Rexhep Taip Erdogan po shkon drejt një tjetër mandati pas më shumë se 20 vitesh në pushtet.
Sipas të dhënave paraprake, Erdogan ka marrë 50.30% të votave. Rivali i tij republikan Kemal Kilicdaroglu ka marrë 43.91% të votave. Nëse këto rezultate do të konfirmohen atëherë Erdogan ka rrëzuar të gjitha sondazhet që i jepnin fitoren opozitës. I treti është renditur Sinan Ogan me 5.31% të votave ndërsa i fundit është Muharrem Inçe me 0.48% të votave i cili pak ditë më parë deklaroi tërheqjen nga gara, por emri i tij kishte mbetur në fletën e votimit.
Nëse asnjë kandidat nuk siguron më shumë se gjysmën e votave në raundin e parë të votimit, do të mbahet balotazh më 28 maj. Pjesëmarrja është 88.32% të personave që kishin të drejtë vote.
