TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një çift të moshuarish humbi jetën nga zjarret në ishullin grek të Salaminës të dielën, ndërsa Belgjika po përballet me zjarrin më të madh të kohëve moderne, në një zonë të paarritshme pranë Gjermanisë, në valën e fundit të zjarreve që kanë përfshirë Evropën.
Çifti humbi jetën jashtë shtëpisë së tyre, në zonën e plazhit Peristeria në Salaminë, njoftoi Roja Bregdetare e Greqisë. Më shumë se 500 persona u urdhëruan të evakuoheshin.
Në Spanjë, një ushtar humbi jetën të dielën ndërsa po ndihmonte në përpjekjet për shuarjen e një zjarri të madh në Aragon, njoftuan autoritetet. Përforcime nga Franca pritej të ndihmonin në vënien nën kontroll të zjarrit në rajonin verilindor, i cili ka vijuar prej një jave dhe ka kërcënuar një manastir 1,000-vjeçar.
Në Belgjikë, një zjarr që shpërtheu të premten në High Fens, një rezervat i madh natyror i frekuentuar nga alpinistët dhe turistët, kishte përfshirë rreth 3,000 hektarë tokë deri të dielën në mëngjes dhe po afrohej drejt kufirit me Gjermaninë.
Rreth 600 persona në komunat Waimes dhe Butgenbach, në provincën e Lieges, u urdhëruan të shtunën të largoheshin nga shtëpitë e tyre. Edhe turistëve iu kërkua të largoheshin, pasi drejtimi i erës ndryshoi dhe tymi u përhap.
Herve Jamar, guvernatori i Lieges, tha se më shumë se 250 zjarrfikës dhe pjesëtarë të shërbimeve të emergjencës ishin përfshirë në operacion, përfshirë edhe zjarrfikës nga Gjermania.
Edhe fermerët po ndihmojnë në luftën kundër zjarrit, duke përdorur traktorët e tyre për të transportuar ujë nga liqeni Robertville.
Zjarri, i përshkruar nga zyrtarët si më i madhi në historinë moderne të Belgjikës, nisi në një zonë që në vitin 1911 ishte prekur rëndë nga zjarre masive gjatë një periudhe thatësire.
Në Portugali, qindra zjarrfikës po përballeshin me një seri zjarresh. Pranë Dines, një fshat afër kufirit me Spanjën, pesë zjarrfikës u plagosën pasi automjeti i tyre mori flakë, raportuan mediat lokale. Zjarre të tjera po djegin pranë kufirit me Spanjën, përfshirë në Boticas dhe Chaves.
Ndryshimet klimatike të shkaktuara nga aktiviteti njerëzor po përkeqësojnë kushtet ekstreme të motit në mbarë botën, duke sjellë fatkeqësi më të shpeshta dhe më vdekjeprurëse, nga valët e të nxehtit te përmbytjet dhe zjarret.
Një pjesë e madhe e Evropës po përjeton një tjetër periudhë të temperaturave ekstreme, duke krijuar kushte të favorshme për shpërthimin e zjarreve.
Të premten, një zjarr përfshiu banesat në një resort turistik në Kroaci, duke shkaktuar një viktimë, 40 të plagosur dhe detyruar 1,200 persona të evakuoheshin, njoftuan autoritetet. Ndërkohë, BE-ja paralajmëroi se zona me kushte “shumë ekstreme” për zjarret po shtriheshin në pjesë të ndryshme të kontinentit.
Qindra persona të tjerë u evakuuan nga fshatrat në Gjermaninë perëndimore dhe Francën jugperëndimore, ndërsa pushues të bllokuar u larguan nga plazhet e rrezikuara nga flakët në Greqi dhe ushtria spanjolle shpëtoi objekte me vlerë historike.
