TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Eduart Dushku, i njohur edhe me emrin Edison Dushku dhe nofkën “i forti i Saukut”, është një personazh i njohur në Tiranë. Emri i tij është përmendur ndër vite në disa ngjarje kriminale, hetime policore dhe procedime për vepra të ndryshme penale.
Dushku u bë i njohur për publikun pas vrasjes së Abdulla Vrapit, në gusht të vitit 2011, në zonën e njohur si “Depot e Ujit”, pranë Sanatoriumit në Tiranë.
Ai u arrestua në mars 2012, pasi u dyshua nga hetuesit për përfshirje në këtë ngjarje. Sipas raportimeve të kohës, konflikti dyshohej se kishte nisur për motive të lidhura me transportin urban.
Emri i tij u rikthye në vëmendje në vitet 2014 dhe 2015, kur në Saukun e Vjetër u regjistruan dy ngjarje, djegia e një automjeti dhe një shpërthim me lëndë plasëse në një lokal. Dushku u përmend në raportimet mediatike në lidhje me hetimet për këto episode.
Në shtator të vitit 2017, ai u arrestua sërish, në kuadër të një çështjeje që lidhej me shkatërrimin e pronës me zjarr, ndërsa ndaj tij ishte caktuar më herët masa e sigurisë “arrest në shtëpi”.
Një tjetër arrestim u regjistrua më 1 mars 2018, gjatë operacionit policor të koduar “Përsëritësi”. Dushku u kap në rrugën e Elbasanit, ndërsa gjatë kontrollit në banesën e tij policia raportoi gjetjen e sendeve të paligjshme.
Në prill të vitit 2020, emri i tij u përfshi edhe në aksionin e Operacionit Forca e Ligjit. OFL-ja i sekuestroi tre automjete dhe i kërkoi të deklaronte burimin e pasurisë.
Dushku është përmendur gjithashtu në raportimet mediatike për një marrëdhënie biznesi me ish-kryeprokurorin Adriatik Llalla, në lidhje me një pronë të blerë prej tij.
