TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Agjencia ndërkombëtare e lajmeve AFP ka pasqyruar protestën e zhvilluar këtë të shtunë në Tiranë kundër qeverisë së kryeministrit Edi Rama.
Në artikullin e publikuar më 31 tetor, AFP raporton se protestues të maskuar hodhën gurë dhe bomba molotov në drejtim të policisë, ndërsa kërkesa kryesore e demonstruesve ishte dorëheqja e kryeministrit.
Sipas agjencisë, protestat në Shqipëri nuk kanë një organizim apo drejtues të vetëm. Ato nisën në mënyrë paqësore në muajin maj, të nxitura nga pakënaqësitë lidhur me korrupsionin e perceptuar. Shkëndija e parë ishte kundërshtimi ndaj një projekti për ndërtimin e një hoteli luksoz në një zonë të mbrojtur natyrore.
AFP vëren se që nga mesi i tetorit, protestat janë shndërruar në një valë tubimesh, disa prej të cilave janë shoqëruar me përplasje. Përveç shqetësimeve për korrupsionin, qytetarët kanë ngritur edhe problematikat e sistemit shëndetësor dhe mungesën e perspektivës për të rinjtë.
Duke iu referuar protestës së kësaj të shtune, agjencia raporton se tubimi nisi në mënyrë paqësore përpara Ministrisë së Arsimit, pavarësisht reshjeve të shiut. Situata u tensionua më pas, kur dhjetëra të rinj hodhën gurë dhe bomba molotov drejt policisë, ndërsa u vunë flakën edhe koshave të mbeturinave.
Sipas AFP-së, policia ndërhyri me dy autobotë uji për shpërndarjen e protestuesve.
Në artikull përmendet gjithashtu deklarata e një zyrtari, sipas të cilit 269 persona nën moshën 18 vjeç ishin arrestuar.
AFP ndalet edhe te masat e reja të ndërmarra nga qeveria të mërkurën, të cilat parashikojnë gjoba deri në 5,500 euro për pjesëmarrësit që përfshihen në akte dhune.
Raportimi i agjencisë ndërkombëtare e paraqet protestën e 31 tetorit si pjesë të një vale më të gjerë pakënaqësish që kanë përfshirë Shqipërinë gjatë muajve të fundit.
