TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kristjan Asllani është një hap larg largimit nga Interi dhe transferimit te Al Jazira në Emiratet e Bashkuara Arabe, në një lëvizje që mund të shënojë një kapitull të ri në karrierën e mesfushorit të Kombëtares shqiptare.
Pas disa orësh negociatash, situata ka ndryshuar ndjeshëm. Nëse fillimisht Asllani kishte hezituar për një transferim jashtë Europës, tashmë futbollisti i ka hapur derën kalimit te Al Jazira, duke i dhënë mundësi marrëveshjes të avancojë.
Ndërkohë, sipas raportimeve të fundit, Al Jazira dhe Interi kanë arritur një marrëveshje verbale për transferimin e mesfushorit shqiptar. Detajet përfundimtare të operacionit dhe kontratës personale të Asllanit janë ende duke u diskutuar.
Zbulohet formula e transferimit
Sipas Fabrizio Romanos, marrëveshja parashikon një huazim me vlerë 2 milionë euro, ndërsa në kontratë do të përfshihet një opsion blerjeje prej 6.5 milionë eurosh.
Ky opsion mund të shndërrohet në detyrim blerjeje nëse plotësohen disa kushte të përcaktuara në marrëveshje. Pra, nëse të gjitha kushtet realizohen, operacioni mund të çojë në një transferim përfundimtar të Asllanit te klubi nga Abu Dhabi.
Interi fillimisht kishte kërkuar një shitje të përhershme për mesfushorin, pasi ai nuk konsiderohet pjesë e planeve kryesore të trajnerit Cristian Chivu. Megjithatë, klubi italian është tashmë i gatshëm të pranojë edhe këtë formulë për të zgjidhur të ardhmen e futbollistit.
Asllanin e pret një kontratë e rëndësishme në Emirate
Një nga faktorët që mund të ketë ndikuar në vendimin e Asllanit është edhe oferta personale. Mediat ndërkombëtare raportojnë se në Emirate e pret një kontratë financiarisht e favorshme, ndërsa Al Jazira e sheh shqiptarin si një përforcim të rëndësishëm për mesfushën.
Kështu, Asllani do të largohej nga futbolli europian në moshën 24-vjeçare, pas një periudhe ku nuk arriti të siguronte një rol të qëndrueshëm në formacionin e Interit.
Nga Empoli te Interi, më pas huazimet
Asllani iu bashkua Interit nga Empoli në vitin 2023. Në Milano ai pati konkurrencë të fortë për një vend në mesfushë, fillimisht pas Marcelo Brozovic dhe më pas pas Hakan Calhanoglut.
Gjatë sezonit të fundit, mesfushori shqiptar ishte i huazuar te Besiktas. Në aventurën e tij në Turqi ai zhvilloi 33 ndeshje, shënoi dy gola dhe dha dy asistime.
Interi kishte njoftuar zyrtarisht në janar 2026 edhe transferimin e tij në huazim te Besiktas, pas rikthimit nga Torino.
Tashmë, e ardhmja e Asllanit duket se po merr një drejtim të qartë. Al Jazira është shumë pranë sigurimit të shërbimeve të tij, Interi ka dhënë miratimin për formulën e marrëveshjes dhe vetë futbollisti ka hapur derën për transferimin.
Nëse detajet e fundit të kontratës mbyllen pa probleme, Kristjan Asllani do të nisë një aventurë të re në Emiratet e Bashkuara Arabe, duke lënë pas Interin dhe futbollin europian.
