TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti amerikan Donald Trump ka ashpërsuar retorikën ndaj demokratëve në prag të zgjedhjeve të mesmandatit, duke i cilësuar kandidatët e tyre si të rrezikshëm dhe duke i akuzuar për mbështetje ndaj xhihadistëve dhe Vëllazërisë Myslimane.
Mediat e huaja raportojnë se, gjatë fjalimit të tij të fundit para votimeve të së martës, Trump deklaroi se demokratët po mbështesin politika që, sipas tij, kërcënojnë të ardhmen e Shteteve të Bashkuara.
“Ne luftuam për 250 vjet për ta bërë vendin tonë të madh. Ata nuk do të na shkatërrojnë”, u shpreh presidenti amerikan, duke iu referuar kundërshtarëve politikë.
Fjalimi u mbajt në Uashington, ku Trump inauguroi gjithashtu Pishinën Reflektuese, një nga monumentet më të njohura të kryeqytetit amerikan, pas një procesi rinovimi që është shoqëruar me kritika për cilësinë e punimeve dhe ndryshimet në projekt.
Presidenti zbuloi se gjatë diskutimeve për projektin ishte menduar edhe mundësia që liqeni të merrte emrin e tij, si “Pishina Reflektuese Trump”, por e cilësoi këtë ide si shaka.
Gjatë ceremonisë, ai kritikoi paraardhësit Barack Obama dhe Joe Biden, duke pretenduar se gjatë administratave të tyre ishin shpenzuar shuma të mëdha pa zgjidhur problemet e objektit, ndërsa e përshkroi rezultatin e ndërhyrjes së fundit si një vepër arti.
Trump foli gjithashtu për uljen e kriminalitetit në Uashington, rolin e Gardës Kombëtare dhe ndërhyrjet e realizuara në kryeqytet.
Ai vlerësoi punën e administratës së tij, duke theksuar se kishte përmbushur premtimet e dhëna gjatë fushatës.
Fjalimi shërbeu si një tjetër përpjekje e presidentit për të mobilizuar bazën republikane në orët e fundit përpara një procesi zgjedhor që konsiderohet vendimtar për balancat politike në Kongresin amerikan.
