TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Dy projekte të reja fotovoltaike, me një kapacitet të kombinuar prej 120 MW, kanë avancuar në procedurat rregullatore për prodhimin e energjisë elektrike në Shqipëri. Në mbledhjen e fundit, Bordi i Entit Rregullator të Energjisë vendosi të nisë procedurat për licencimin në veprimtarinë e prodhimit të energjisë elektrike për dy impiante të mëdha fotovoltaike, që parashikohet të ndërtohen në Lushnjë dhe Devoll.
Projekti më i madh parashikon ndërtimin e një impianti fotovoltaik me kapacitet të instaluar 70 MW në Savër të Lushnjës, në Qarkun Fier. Projekti përfshin edhe veprat ndihmëse, pa ndryshuar fuqinë totale të instaluar.
Ndërkohë, projekti tjetër parashikon një central fotovoltaik me kapacitet 50 MW, që do të vendoset në afërsi të fshatit Vërnik, Njësia Administrative Qendër Bilisht, Bashkia Devoll. Të marra së bashku, dy investimet përfaqësojnë 120 MW kapacitet të planifikuar, një fuqi e konsiderueshme për përmasat e sistemit energjetik shqiptar. Për krahasim, dy impiantet së bashku do të kishin një kapacitet sa rreth 86% e parkut fotovoltaik të Karavastasë prej 140 MW.
Në raport me rreth 3,213 MW kapacitet prodhues të instaluar që Shqipëria kishte në fund të vitit 2024, 120 MW përfaqësojnë rreth 3.7% të fuqisë së instaluar të sistemit në atë periudhë. Të dy projektet kishin marrë më herët edhe miratimin e Këshillit të Ministrave. Projekti 50 MW në Devoll u miratua në mars 2026, ndërsa ai 70 MW në Savër në maj 2026. Për të dy investimet parashikohet që pajisja me lejen e ndërtimit, ndërtimi dhe vënia në operim të realizohen brenda 36 muajve nga hyrja në fuqi e vendimeve përkatëse.
Projektet nuk janë objekt koncesioni dhe nuk përfitojnë nga masat mbështetëse për prodhimin e energjisë elektrike. Vendimi i ERE-s për nisjen e procedurave të licencimit nuk do të thotë se 120 MW i shtohen menjëherë kapacitetit prodhues të Shqipërisë. Impiantet duhet të përfundojnë procedurat përkatëse, të ndërtohen dhe të lidhen me sistemin përpara se të konsiderohen kapacitete operative.
Dy projektet janë pjesë e zgjerimit të shpejtë të investimeve në energjinë diellore, që gjatë viteve të fundit po ndryshojnë gradualisht strukturën e prodhimit të energjisë elektrike në Shqipëri.
