TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Autoritetet turke kanë arrestuar Ismail Abdo, një nga krerët më të kërkuar të bandave kriminale në Suedi, i njohur me nofkën “Luleshtrydhe”, gjatë një operacioni të gjerë antidrogë të zhvilluar në Turqi.
35-vjeçari me shtetësi të dyfishtë suedeze dhe turke, konsiderohet si udhëheqës i bandës “Rumba”, një grup famëkeq i përfshirë në trafik ndërkombëtar droge dhe nxitje të krimeve të dhunshme. Ai ishte subjekt i një njoftimi të kuq nga Interpol që prej vitit të kaluar.
Operacioni çoi në arrestimin e 19 personave, ndërsa janë lëshuar 21 urdhër-arreste të tjera, përfshirë 14 persona që ndodhen jashtë Turqisë dhe 3 të tjerë që janë tashmë në paraburgim për akuza të ndryshme.
Policia turke sekuestroi më shumë se një ton drogë dhe asete me vlerë rreth 1.5 miliardë lira turke (rreth 38 milionë dollarë), përfshirë 20 automjete luksoze, llogari bankare dhe 51 pasuri të paluajtshme.
Abdo, që dyshohet se orkestronte aktivitetin kriminal nga jashtë Suedisë, është gjithashtu i përfshirë në një luftë të përgjakshme me bandën rivale “Foxtrot”, të drejtuar nga ish-partnerja e tij, Rawa Majida. Përplasja midis dy grupeve ka përshkallëzuar ndjeshëm dhunën e bandave në Suedi, sidomos pas vrasjes së nënës së Abdos në vitin 2023 në qytetin Uppsala.
Përballë situatës në përkeqësim, qeveria suedeze ka përfshirë edhe forcat e armatosura në luftën kundër krimit të organizuar. Sipas një raporti të policisë, në Suedi rreth 14,000 persona janë të përfshirë në grupe kriminale, ndërsa 48,000 të tjerë kanë lidhje të drejtpërdrejta ose të tërthorta me to.
