TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Autoritetet shëndetësore dhe të mbrojtjes së konsumatorit në Francë kanë paralajmëruar për shitjen online të më shumë se 40 mijë prezervativëve të papërshtatshëm, duke u bërë thirrje personave që mund t’i kenë përdorur këto produkte të kryejnë teste për infeksionet seksualisht të transmetueshme (IST).
Agjencia franceze e mbrojtjes së konsumatorit dhe Drejtoria e Përgjithshme e Shëndetësisë paralajmëruan se produktet mund të paraqesin rrezik serioz për shëndetin dhe sigurinë e përdoruesve, përfshirë shtatzënitë e padëshiruara dhe transmetimin e IST-ve.
Platformat online ku janë tregtuar produktet janë urdhëruar t’i heqin menjëherë nga shitja. Deri tani janë hequr 36 lista, ndërsa disa prej platformave kanë deklaruar se do të rishikojnë procedurat e tyre të kontrollit dhe verifikimit.
Rreth 30 linja pa certifikimin e detyrueshëm
Hetimet kanë identifikuar rreth 30 linja prezervativësh që nuk mbanin shenjën e sigurisë CE, e cila kërkohet nga Bashkimi Evropian. Produktet, sipas autoriteteve, nuk kishin kaluar as kontrollet e nevojshme të përputhshmërisë nga palë të treta të pavarura.
Pjesa më e madhe e tyre ishte shitur nga furnizues aziatikë përmes platformave të mëdha të tregtisë online.
Problemi nuk është kufizuar vetëm te produktet e shitura në internet.
Gjatë kontrolleve në dyqane dhe farmaci, autoritetet kanë identifikuar edhe dy produkte me defekt që mbanin markën CE. Njëri paraqiste rrezik për çarje, ndërsa në tjetrin u konstatuan vrima.
Operacion më i gjerë në Evropë
Alarmi në Francë është pjesë e një operacioni më të gjerë evropian kundër produkteve që nuk përmbushin standardet e sigurisë.
Në korrik, autoritetet evropiane kundër mashtrimit zbuluan më shumë se 200 mijë prezervativë fals, të cilët shiteshin duke përdorur logon e një marke të njohur.
Paralajmërimi francez vjen në një periudhë kur infeksionet seksualisht të transmetueshme po shënojnë rritje në Evropë.
Sipas të dhënave të Qendrës Evropiane për Parandalimin dhe Kontrollin e Sëmundjeve (ECDC), në vitin 2023 u regjistruan në Evropë rreth 100 mijë raste të konfirmuara të gonorresë. Numri përfaqëson një rritje prej 31% krahasuar me vitin 2022 dhe më shumë se 300% krahasuar me vitin 2014.
Sipas ECDC-së, bëhet fjalë për nivelin më të lartë të regjistruar në Evropë që prej nisjes së monitorimit të IST-ve në vitin 2009.
