TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një ngjarje e rëndë ka tronditur qytetin Fagersta në Suedinë qendrore, ku një person i armatosur me shpatë hyri në një shkollë të mesme dhe plagosi disa persona. I dyshuari u arrestua nga policia pas ndërhyrjes në vendngjarje, ndërsa autoritetet kanë bërë të ditur se nuk ka më rrezik për publikun.
Sulmi ndodhi të premten në shkollën e mesme Brinellskolan, e cila ka rreth 450 nxënës të moshave 16 deri në 20 vjeç. Shkolla sapo ishte rihapur pas pushimeve verore dhe për disa prej nxënësve ishte dita e parë e vitit të ri shkollor.
Policia mori një telefonatë në orën 14:06, pas një raportimi për një rast të dhunës së rëndë që po zhvillohej në shkollë. Forcat e rendit u nisën menjëherë drejt vendngjarjes, duke dërguar të gjitha burimet e disponueshme. Në zonë mbërritën ambulanca, automjete të shumta policie, një helikopter policie dhe forcat speciale.
Tre persona të plagosur, dy në gjendje të rëndë
Sipas autoriteteve shëndetësore të rajonit Västmanland, tre persona u plagosën, mes tyre dy djem të moshës 12 dhe 17 vjeç. Dy prej të plagosurve u dërguan për trajtim dhe u raportuan në gjendje të rëndë, ndërsa një person i tretë po dërgohej për trajtim mjekësor.
Autoritetet nuk kanë raportuar për viktima me humbje jete.
I dyshuari, 18-vjeçar dhe ish-nxënës i shkollës
Sipas informacioneve të publikuara nga transmetuesi suedez SVT dhe të raportuara edhe nga Reuters, personi i dyshuar është një 18-vjeçar, ish-nxënës i Brinellskolan. Sipas këtyre raportimeve, ai kishte pasur edhe më parë probleme me ligjin, pasi ishte dënuar për sulm ndaj një nxënësi tjetër në shkollën ku kishte ndjekur mësimet më herët. Raportohet gjithashtu se ai kishte qenë nën kujdes institucional në kuadër të legjislacionit suedez për të miturit.
Sipas SVT, 18-vjeçari dyshohet se kreu sulmin i pajisur me një shpatë dhe një helmetë.
Si u kap autori?
Pas alarmit, në shkollë u zhvillua një operacion i gjerë policor. Efektivët mbërritën me forca të armatosura dhe nisën kontrollin e ambienteve për të neutralizuar kërcënimin dhe për të siguruar nxënësit dhe stafin.
Policia konfirmoi se një person u ndalua dhe u vu në pranga. Autoritetet nuk kanë dhënë ende një përshkrim të plotë të momentit të arrestimit.
Megjithatë, mediat suedeze raportojnë se policia qëlloi të dyshuarin në këmbë gjatë ndërhyrjes, përpara se ai të arrestohej. Informacioni është raportuar nga Aftonbladet dhe është përcjellë nga media të tjera ndërkombëtare, ndërsa policia nuk e ka konfirmuar zyrtarisht këtë detaj.
Sipas SVT, pas incidentit forca të armatosura të policisë janë parë edhe pranë adresës së të dyshuarit në Fagersta.
Tetë shkolla në bllokim
Pas sulmit, autoritetet vendosën në bllokim disa shkolla dhe ambiente publike në Fagersta, si masë sigurie. Në mesin e objekteve të prekura ishin Olympen, Fagerstahallen, Risbroskolan, Skogsglantan, Björksta, Prästkragen dhe Norrbybacken.
Policia u bëri thirrje qytetarëve që të respektonin barrierat e vendosura dhe udhëzimet e forcave të rendit, ndërsa vijoi kontrollin e zonës dhe mbledhjen e provave.
Bashkia e Fagerstas aktivizoi gjithashtu një qendër krize në një qendër sportive pranë shkollës, për t’u ofruar mbështetje nxënësve, prindërve dhe personave të prekur nga ngjarja.
Hetimet vijojnë, ende pa një motiv
Deri tani, motivi i sulmit nuk është bërë i ditur. Policia po heton rrethanat e ngjarjes dhe po shqyrton edhe pamjet e kamerave të sigurisë për të rindërtuar dinamikën e sulmit.
Kryeministri suedez, Ulf Kristersson, e cilësoi ngjarjen si një incident serioz, ndërsa tha se autoritetet ende nuk e dinë se çfarë qëndron pas sulmit. Edhe ministri i Drejtësisë, Gunnar Strömmer, deklaroi se qeveria është në kontakt të ngushtë me policinë dhe po ndjek nga afër zhvillimet.
Policia ka bërë të ditur se situata është nën kontroll dhe se nuk ekziston më rrezik i drejtpërdrejtë për publikun. Hetimet vijojnë për të zbardhur motivin, dinamikën e plotë të sulmit dhe përgjegjësinë penale të të dyshuarit.
