AKTUALITET, 21 Nëntor 2023, 16:02

Ministri grek takohet me kryebashkiakun Fredi Beleri në burgun e Durrësit

Ministri grek takohet me kryebashkiakun Fredi Beleri në burgun e

Ministri i Shtetit të Greqisë, Stavros Papastavrou, ka takuar sot kryebashkiakun e zgjedhur të Himarës, Fredi Beleri, i cili ndodhet në burg.

Takimit ka nisur mesditën e sotme në burgun e Durrësit, ku ndodhet prej muajsh Beleri. Vizita bëhet ne funksionin të gjyqit që do të bëhet nesër, për të shprehur edhe njëherë mbështetjen ndaj tij.

Beleri u arrestua dy ditë përpara zgjedhjeve vendore të 14 majit. Sipas prokurorisë, përgjimet e realizuara tregojnë se ai ka ofruar para në këmbim të votave në favor të tij. Zoti Beleri ka hedhur poshtë akuzat dhe ka folur për një akt me sfond politik. Kërkesat e tij të herëpashershme për ndryshimin e masës së sigurisë janë refuzuar nga të gjitha shkallët e gjyqësorit, të cilave ai u është drejtuar sërish me të njëjtën kërkesë.

Arrestimi i tij ka acaruar dukshëm marrëdhëniet mes Tiranës dhe Athinës. Kjo e fundit ka kërkuar lirimin e tij, me pretendimin se janë shkelur të drejtat e njeriut dhe ato të të pakicave, si dhe duke kërcënuar me bllokimin e rrugëtimit të Shqipërisë në procesin e anëtarësimit në Bashkimin europian.