TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Nga qyteti i Lushnjës, ish-kryeministri Sali Berisha ka paralajmëruar protesta, duke i bërë thirrje qytetarëve që të angazhohen në misionin e opozitës.
Berisha tha se duhet të vërshojmë drejt Tiranës, të protestojmë kudo ku ka padrejtësi dhe populli të ngrihet në këmbë.
Sali Berisha u shpreh i bindur se do të fitojnë ne betejën e tyre, ndërsa theksoi se sot parlamenti ka bërë prova për ditën e hënë, ku është dhënë urdhëri që të rrethohet nga Garda.
“Në këtë mënyrë të vërshojmë drejt Tiranës, në këtë mënyrë të protestojmë kudo ku lind padrejtësia. Të ngremë një popull të tërë në këmbë, një popull që qeveria e uron, qeveria e shtyp, e vjedh, një popull që nuk meritoni një trajtim të tillë. Ju falënderoj dhe ju ftoj në këtë mision. Parlamentin e kanë rrethuar me polici dhe gardiste, Sot kanë bërë provat e përgjithshme, por prova e përgjithshme është e jona, fitorja është e deputetëve të opozitës, ne nuk tërhiqemi, ne do fitojmë”, tha Berisha.
Pjese nga fjala e Berishes
Pra kemi ardhur në një moment ku çdo e drejtë e popullit opozita është e mohuar. Zgjedhjet i përcaktojnë bandat, i përcaktojnë zarfet me para të ndara në mes të fushatës për 683 mijë pensionistë.
Zgjedhjet i përcakton patronazhisti, aktivisti, i shndërruar në një terrorist kundër jush, terroristë të votës tuaj, në mënyrë që ne si opozitë të mos marrim dot ato vota që duam. Nga lista hiqet emri i PD-së. Me gjykata të kontrolluara totalisht i merret vula PD-së. Në fletëvotimit nuk vendoset emri i kryetarit të saj. Për 61 kandidatë në mbarë vendin nuk jepet një qindarkë nga fondet e buxhetit të shtetit.
Ndërkohë për 12 kandidatë të pengBravës jepen 1.2 mln euro.
Pra ku jemi sot? Sot ne jemi para alternativës, ‘të jemi apo mos jemi’. Por ne do të jemi. Ne jemi forca politike që përmbysëm një diktaturë. Ne jemi forca politike që do të përmbysim këtë diktaturë.
Asgjë në botë nuk mund të na pengojnë ne më, në misionin tonë për të përmbysur diktaturën e bandave të instaluar në Shqipëri.
Kjo është prova e jonë, prova e guximit tonë, prova e vizionit tonë, prova e mbrojtjes së idealeve tona, e mbrojtjes së demokracisë, e interesit kombëtar, prova e mbrojtjes së interesit të fëmijëve tanë.
Kësaj provës ne nuk i shmangemi. Kësaj prove njëlloj si në himnin e flamurit ne do ti qëndrojmë. Në këtë provë për kauzën tonë të drejtë, për kauzën e drejtë të çdo shqiptari që beson në pluralizmin si promotor i demokracisë ne do të fitojmë.
Kjo provë kërkon sakrifica, guxim.
Por ju kujtoj këtu se mes të gjitha formave të diktaturave, diktaturës komuniste, naziste, teokratike, diktatura e bandës është më e zeza, më e keqe. E them këtë për të kuptuar se beteja është jo e lehtë.
Beteja ka nevojë për shembullin e secilit prej jush. Ka nevojë për angazhimin e secilit prej jush.
Betejën e nisëm ne në parlament. E nisëm betejë pa kthim, e nisëm të betuar se ne do të mbrojmë të drejtat tuaja, opozitën, pluralizmin me çdo çmim, mënyrë, ne nuk tërhiqemi.
Ai është akt i një grupi deputetësh të cilët vendosën të qëndrojnë në emër tuaj, për të shpëtuar pluralizmin.
Por secili prej jush duhet të marrë një vendim të tillë. Të bëjmë gjithçka për të shpëtuar Lushnjen, Shqipërinë dhe demokracinë.
