TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një sasi me lënde plasëse është hedhur mbrëmjen e sotme në oborrin e një banese në lagjen “Qemal Stafa”, në Shkodër, në qendër të qytetit, pranë Bashkisë.
Ngjarja ka ndodhur rreth orës 21:30, ndërsa banesa është në pronësi të 60-vjeçarit Metin Bushati, i cili është mësues.
Sipas Policisë, lënda plasëse është hedhur nga persona ende të paidentifikuar në oborrin e banesës. Nga shpërthimi nuk ka pasur persona të lënduar, ndërsa janë shkaktuar dëme të vogla materiale.
Si pasojë e shpërthimit janë thyer edhe xhamat e disa pallateve që ndodhen pranë vendit të ngjarjes.
Dyshohet se motivet e ngjarjes mund të lidhen me vëllanë e 60-vjeçarit, Gezim Bushati, dhe veprimtarinë e tij në Gjermani. Ky është një pistë që po hetohet nga autoritetet.
Pas ngjarjes, forca të shumta policie kanë rrethuar zonën, ndërsa grupi hetimor, nën drejtimin e Prokurorisë, po punon për dokumentimin e plotë të rrethanave të shpërthimit.
Hetimet vijojnë për identifikimin dhe kapjen e autorit ose autorëve të dyshuar, si dhe për përcaktimin e plotë të motivit të ngjarjes.
Njoftimi i Policisë
“Shkodër / Informacion paraprak. Rreth orës 21:30, në lagjen ‘Qemal Stafa’, Shkodër, në oborrin e banesës së shtetasit M. B., rreth 60 vjeç, nga persona ende të paidentifikuar është hedhur një sasi e vogël lënde plasëse, duke shkaktuar vetëm dëme të vogla materiale. Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes, si dhe për identifikimin dhe kapjen e autorit/autorëve.”
