TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Autoritetet greke kanë shkatërruar një rrjet të mirëorganizuar të trafikimit dhe shpërndarjes së kokainës në ishullin e Mykonosit, i cili dyshohet se përdorte kompani transporti turistësh si mbulesë për aktivitetin kriminal dhe pastrimin e parave.
Në kuadër të operacionit të zhvilluar më 21 gusht, në pranga kanë rënë nëntë persona, shqiptarë, grekë dhe turq. Sipas hetimeve, të arrestuarit ishin pronarë të tri kompanive private të transportit, të cilat ofronin shërbime transferimi për turistët në ishull.
Sipas autoriteteve, furgonët e kompanive u mundësonin anëtarëve të grupit të lëviznin lirshëm në zona të ndryshme të Mykonosit, pa ngjallur dyshime, ndërsa njëkohësisht shërbenin si mbulesë për shpërndarjen e lëndëve narkotike.
Gjatë operacionit, policia sekuestroi sasi të ndryshme droge, para të gatshme dhe shtatë furgonë që dyshohet se përdoreshin nga rrjeti.
“Garniturë rozë”, “vajza” dhe “recetë sekrete”
Hetimet kanë zbuluar se anëtarët e grupit përdornin një gjuhë të koduar gjatë komunikimeve telefonike, me qëllim që të fshihnin aktivitetin e tyre nga autoritetet.
Sipas të dhënave të hetimit, kokaina rozë përmendej me terma si “lachmatzoun”, “garniturë rozë”, “me ngjyra” ose “recetë sekrete”, ndërsa kokaina e zakonshme quhej “klasike”, “vezë” apo “vajza”.
Sipas hetimeve, një gram kokainë e zakonshme shitej për 120 deri në 150 euro, ndërsa një gram kokainë rozë për 170 deri në 200 euro. Për një gram MDMA, çmimi varionte nga 60 deri në 80 euro.
Në një përgjim telefonik të datës 19 korrik, dyshohet se dy anëtarë të rrjetit flasin për vendndodhjen ku ishte fshehur lënda narkotike.
Anëtari 1: “Ke edhe… në… panelin e instrumenteve përpara, atje në ndarjen e kruskotit...”
Anëtari 2: “Po.”
Anëtari 1: “Ke edhe dy lakman. Janë në... në lojë...”
Anëtari 2: “Po.”
Anëtari 1: “Mbaje mendjen... Vetëm mbaje mendjen, kështu. Mbaje mendërisht.”
Hetimi nisi në fillim të korrikut
Sipas autoriteteve greke, hetimi nisi në fillim të korrikut, pas informacioneve për një organizatë kriminale që vepronte mes Atikës dhe Mykonosit.
Pika e parë e hetimit ishte përgjimi i një personi jo grek, i njohur me pseudonimin “ISA”. Nga hetimet e mëtejshme, autoritetet dyshuan se grupi kishte krijuar një strukturë të organizuar për furnizimin dhe shpërndarjen e drogës në ishull.
Një oficer i Prokurorisë greke shpjegoi mënyrën se si kompanitë e transportit përdoreshin si mbulesë.
“Si një mjet për të fshehur aktivitetin e tyre të paligjshëm në ishullin e Mykonosit, ata përdorin kompani transporti që janë aktive në transportimin e turistëve dhe vizitorëve në ishull. Nëpërmjet këtij aktiviteti profesional, anëtarët e organizatës vendosin kontakt të drejtpërdrejtë me një numër të madh vizitorësh të huaj ose vendas në ishull”, u shpreh oficeri.
Paratë pastroheshin edhe përmes pagesave elektronike
Përveç përdorimit të parave të gatshme, grupi dyshohet se përdorte edhe sisteme elektronike pagesash për të kamufluar të ardhurat nga aktiviteti kriminal.
Sipas oficerit që drejtoi hetimet, anëtarët e organizatës përdornin POS, llogari të platformës Revolut dhe sistemin IRIS për të lehtësuar pagesat nga klientët dhe për të krijuar pamjen se paratë vinin nga shërbimet legjitime të transportit.
“Anëtarët e organizatës nuk ishin të kufizuar vetëm në përdorimin e parave të gatshme për shitjen e drogës. Ata gjithashtu përdornin instrumente elektronike të pagesës POS, llogaritë e platformës Revolut dhe IRIS, me qëllim lehtësimin e klientëve të tyre dhe arritjen e pastrimit të parave duke justifikuar transaksionin si një aktivitet legjitim nga ofrimi i shërbimeve të transferimit”, deklaroi oficeri.
Të nëntë personat e arrestuar pritet të dalin të enjten e ardhshme para hetuesit, ku do të japin dëshmitë e tyre zyrtare lidhur me akuzat dhe aktivitetin e dyshuar të rrjetit.
