TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Mijëra studentë dhe mësues marshuan këtë të mërkurë në kryeqytetin grek, Athinë, për të protestuar kundër kostos së lartë të jetesës dhe për të kërkuar më shumë investime shtetërore në arsim.
Protesta të ngjashme u zhvilluan edhe në qytete të tjera të Greqisë, përfshirë Selanikun, në veri të vendit, dhe Patrën, qytetin port në perëndim.
Sipas agjencisë së lajmeve Associated Press (AP), rritja e çmimeve, veçanërisht e karburanteve, gjendja e shkollave dhe mungesa e banesave me qira të përballueshme për studentët kanë nxitur protesta në disa vende të Europës. Në Francë, Itali dhe Shqipëri, disa prej demonstratave janë shoqëruar edhe me dhunë.
Në marshimin e zhvilluar në Athinë, protestuesit mbanin pankarta me mesazhe kundër kostos së lartë të jetesës dhe në mbështetje të arsimit publik. “Nga Greqia në Francë, jepni para për arsimin”, shkruhej në njërën prej tyre. Ndërsa në pankarta të tjera, të shkruara në gjuhën frënge, lexohej: “Të studiojmë apo të mbijetojmë?”.
Studenti 20-vjeçar i inxhinierisë, Panagiotis Moschonas, kritikoi qeverinë konservatore greke, duke e akuzuar se nuk ka marrë masa të mjaftueshme për t'i ndihmuar studentët të përballojnë shpenzimet e jetesës.
“Qeveria pretendon se po i ndihmon studentët me një subvencion qiraje prej 120 eurosh në muaj. Kjo shumë nuk mjafton as për gjysmën e qirasë dhe, për më tepër, jepet në fund të vitit”, tha ai.
Marshimi u ndoq nga afër nga forcat e policisë, të cilat kryen kontrolle të rastësishme dhe kontrolluan çantat e personave që po i drejtoheshin protestës.
Duke qenë se demonstratat në Greqi janë shoqëruar shpesh me episode dhune, dyqanet dhe kafenetë përgjatë itinerarit të marshimit ulën qepenat metalikë, me qëllim mbrojtjen e vitrinave dhe xhamave nga dëmtimet e mundshme.
Ndërkohë, mësuesit shpallën grevë për këtë të mërkurë, megjithëse disa shkolla qëndruan të hapura.
Mësuesi Ioannis Rompas shpjegoi arsyet e pjesëmarrjes në grevë, duke vënë theksin te vështirësitë ekonomike të familjeve dhe përkeqësimi i kushteve në shkolla.
“Sot jemi në grevë sepse kjo situatë nuk mund të vazhdojë më për familjet tona. Çmimet janë të larta, po përpiqemi me vështirësi t'ia dalim deri në fund të muajit, ndërsa gjendja në shkolla po përkeqësohet gjithnjë e më shumë nga viti në vit”, deklaroi Rompas.
Protestat në Greqi pasqyrojnë shqetësimet në rritje të studentëve dhe mësuesve për përballimin e shpenzimeve të përditshme, kushtet në institucionet arsimore dhe nevojën për mbështetje më të madhe financiare nga shteti.
