TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Edukatorja e kopshtit publik numër 6 në Korçë, e arrestuar disa ditë më parë nën dyshimin se ka keqtrajtuar një fëmijë 4-vjeçar, do të hetohet në gjendje të lirë. Gjykata ka caktuar ndaj saj masën e sigurisë “Detyrim paraqitje”, ndërsa ka vendosur edhe pezullimin nga detyra.
Vendimi u mor mesditën e sotme, gjatë seancës për caktimin e masës së sigurisë. Hetimet për zbardhjen e plotë të rrethanave të ngjarjes vijojnë.
Denoncimi i nënës së 4-vjeçarit
Rasti u bë publik pas kallëzimit të bërë nga nëna e të miturit, Volsjana Plasa, e cila iu drejtua policisë pasi vuri re se djali i saj prej disa ditësh shfaqte shqetësime dhe nuk dëshironte të shkonte në kopsht.
Sipas rrëfimit të saj për mediat, fëmija i kishte treguar se edukatorja e godiste. Nëna tha gjithashtu se kishte vënë re një shenjë të kuqe në qafën e të birit, çka e kishte shtyrë të kërkonte sqarime për atë që po ndodhte në institucionin parashkollor.
Sipas deklarimeve të nënës, fillimisht ajo kishte ngritur shqetësimin pranë stafit të kopshtit, por pretendimet e saj dhe të fëmijës nuk ishin marrë seriozisht. Ajo ka treguar gjithashtu se, kur shkoi për të marrë të birin, pa edukatoren duke e mbajtur fort nga krahu dhe duke i bërtitur.
Një tjetër detaj shqetësues i rrëfimit të saj lidhet me pretendimin se fëmija i kishte treguar se ishte mbyllur në një qilar dhe se kishte frikë të kthehej në kopsht. Këto janë pretendime të bëra nga nëna, të cilat duhet të verifikohen gjatë hetimit.
Policia këqyri pamjet filmike
Pas denoncimit, shërbimet e Komisariatit të Policisë Korçë kryen veprimet hetimore, përfshirë këqyrjen e pamjeve filmike nga ambientet e kopshtit. Në përfundim të veprimeve paraprake, edukatorja u arrestua nën dyshimin për veprën penale “Keqtrajtimi i të miturve”.
Materialet procedurale iu referuan Prokurorisë së Korçës për veprime të mëtejshme.
Pavarësisht caktimit të masës së sigurisë “Detyrim paraqitje” dhe pezullimit nga detyra, procedimi ndaj edukatores vijon. Rrethanat e ngjarjes dhe përgjegjësia ligjore do të përcaktohen nga organet kompetente.
