TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Administrata e presidentit Donald Trump po përpiqet të dëbojë nga Shtetet e Bashkuara një shqiptar të Kosovës që e përshkruan veten si ish-agjent të CIA-s, i cili pas sulmeve të 11 shtatorit depërtoi në radhët e Al-Qaeda-s dhe fitoi të drejtën për të qëndruar në SHBA pasi ndihmoi në dënimin e terroristëve.
Agjentët e Shërbimit të Emigracionit dhe Doganave të SHBA-së (ICE) arrestuan Blerim Skoron, me origjinë nga Kosova dhe baba i tre fëmijëve, jashtë një zyre emigracioni në New Jersey, ku ai kishte shkuar në fillim të këtij muaji për të rinovuar dokumentacionin.
Avokatët e tij i janë drejtuar një gjykate federale për të ndaluar dëbimin, duke argumentuar se 55-vjeçarit Skoro i ishte premtuar leje qëndrimi pas viteve të tëra pune të rëndësishme si “agjent i CIA-s”.
Skoro, i cili punon si taksist në Staten Island të New Yorkut dhe ka bashkëshorte e fëmijë amerikanë, kishte përfituar në vitin 2022 shtyrjen e urdhrit të dëbimit, për shkak të rrezikut se mund të kapej dhe torturohej nga terroristët nëse largohej nga SHBA-ja.
Vendimi ishte marrë pjesërisht edhe për shkak të ndihmës që Skoro kishte dhënë për arrestimin e anëtarëve të Al-Qaeda-s, Al-Shabaab dhe Hezbollahut, pretendojnë avokatët e tij.
Tashmë ai ka frikë se qeveria amerikane, për të cilën thotë se ka vënë jetën në rrezik, do ta kthejë në Kosovë, ku sipas tij mund të bjerë në duart e personave që kërkojnë ta vrasin.
“Nuk e kisha menduar kurrë se do të më tradhtonin në këtë mënyrë”, tha ai për CBS News në një intervistë telefonike nga Qendra e Paraburgimit Elizabeth në New Jersey. “Ju lutem, nëse duhet të vdes, dua të vdes në këtë vend, në mënyrë që fëmijët e mi të mund të më varrosin.”
Marrëdhënia e Skoros me zyrtarët e inteligjencës amerikane nisi kur ai u burgos për trafik droge në vitin 2000, sipas dokumenteve të FBI-së.
Ai thotë se në atë periudhë po përpiqej me vështirësi të siguronte jetesën për fëmijët dhe prindërit e tij refugjatë, pasi familja ishte larguar nga konflikti në Kosovë gjatë viteve ’90. Skoro u kap duke transportuar heroinë jashtë vendit për llogari të një grupi kriminal shqiptar.
I rritur si mysliman, gjatë vuajtjes së dënimit në një burg në Manhattan ai u afrua me një grup radikalësh islamikë, sipas dokumenteve të FBI-së, ku Skoro figuron si informator konfidencial. Pas sulmeve të 11 shtatorit 2001, ai pretendon se CIA iu afrua për të shfrytëzuar lidhjet që kishte krijuar me këtë grup.
Gjatë kohës që ndodhej në burgun federal FCI Allenwood në Pennsylvania, nga viti 2002 deri në vitin 2006, Skoro thotë se mblodhi informacione për FBI-në mbi persona të lidhur me terrorizmin, mes tyre Faysal Galab, pjesë e të ashtuquajturve “Lackawanna Six”, të cilët agjentët federalë i përshkruan si celulën e parë terroriste të brendshme në SHBA; Randall “Ismail” Royer, pjesë e rrjetit xhihadist të Virginia-s, i dënuar për organizimin e dhunës kundër trupave amerikane jashtë vendit; si edhe anëtarin e Hezbollahut, Junuz Fuaz.
Dokumente të FBI-së të vitit 2004, të siguruara nga CBS News dhe pjesërisht të censuruara, e identifikojnë Skoron si informator në një hetim që kishte në shënjestër Osama bin Ladenin. Sipas dokumenteve, ai kishte dhënë në disa raste informacione “të përdorshme” dhe “të besueshme”, përfshirë të dhëna për një “kamp stërvitor në Siri”.
Skoro besonte se për shkak të bashkëpunimit do t’i reduktohej dënimi, por në vitin 2007 ai u dëbua në Kosovë. Ai pretendon se më pas CIA i kërkoi të depërtonte në Al-Qaeda nga Ballkani. Në SHBA u rikthye vetëm në vitin 2014, sipas një deklarate të mëparshme që kishte paraqitur në kuadër të çështjes së tij të emigracionit.
Blerim Skoro, në të djathtë, gjatë periudhës kur ai thotë se ka punuar për llogari të CIA-s midis viteve 2007 dhe 2009
Skoro pretendon se nga viti 2007 deri në vitin 2009 punoi nën mbulim brenda organizatës terroriste për llogari të CIA-s, duke udhëtuar në një kamp të ISIS-it në Siri dhe duke vepruar në Liban, Jordani, Pakistan, Egjipt dhe në Kosovë.
Fotografitë dhe videot që ai realizoi gjatë asaj periudhe e tregojnë në ambiente që duket se ndodhen në Lindjen e Mesme, në shoqërinë e terroristëve të njohur. Pamjet u përdorën në dokumentarin e vitit 2024, “The Accidental Spy”, si dhe në një episod të “The Shawn Ryan Show” në YouTube vitin e kaluar.
Blerim Skoro gjatë periudhës kur ai thotë se është infiltruar në Al-Qaeda për llogari të CIA-s midis viteve 2007 dhe 2009
Ai duket se ka qenë drejtpërdrejt i përfshirë edhe në arrestimin e terroristit nga Brooklyn, Betim Kaziu, i cili u dënua me 27 vite burg pasi u përpoq të blinte armë për grupin terrorist somalez Al-Shabaab, me synimin për të sulmuar ushtarët amerikanë të dislokuar jashtë SHBA-së.
Në një deklaratë të dhjetorit 2020, Skoro shkruante se kishte telefonuar fshehurazi personin e tij të kontaktit në CIA për t’i treguar vendndodhjen, ndërsa po strehonte Kaziun në apartamentin e tij në Kosovë. Kjo, sipas tij, çoi në arrestimin e Kaziu në korrik 2009, kur atij iu gjetën një pushkë, municione dhe granata.
Skoro i ka treguar CBS News edhe disa email-e të shkëmbyera me një person për të cilin thotë se ishte kontakti i tij në CIA, i identifikuar si “Chris”. Në një email të datës 24 shtator 2009 thuhej: “U gëzova shumë kur pashë se miku ynë Kaziu tani është kthyer në Shtetet e Bashkuara.” CIA nuk iu përgjigj kërkesës për koment.
Skoro pretendon gjithashtu se ndihmoi në kapjen e ngarkesave me uranium që po dërgoheshin drejt Kosovës, duke parandaluar një komplot të mundshëm për krijimin e një “bombe të pistë”. Ai thotë gjithashtu se, duke nisur nga prilli 2015, pasi ishte kthyer në SHBA, i dha informacione të tjera FBI-së dhe Departamentit të Policisë së New Yorkut, pasi pretendon se ishte kontaktuar nga një rekrutues i ISIS-it.
Ish-avokati mbrojtës i Skoros, Joshua Dratel, tha për CBS News se gjatë dekadës së fundit klienti i tij ka bërë një “jetë plotësisht në përputhje me ligjin dhe produktive, së bashku me familjen e tij, pas një përvoje të tmerrshme që ai e përballoi për Shtetet e Bashkuara me shumë guxim dhe aftësi”.
Kërkesa e tij për “habeas corpus”, e depozituar në gjykatën federale pas arrestimit në fillim të këtij muaji, thotë se ai “ka punuar për CIA-n, Byronë Federale të Hetimit dhe Agjencinë Amerikane Kundër Drogës për një periudhë prej afro një dekade” dhe pretendon se ka kryer “punë të përkushtuar dhe heroike si agjent i forcave amerikane të zbatimit të ligjit”.
Bashkëshortja e tij, Susan Skoro, ndodhej me të në zyrën e emigracionit në Elizabeth, New Jersey, kur ai u arrestua më 3 gusht.
Ajo tregoi se, sapo Skoro u paraqit në sportelin e pritjes, agjentët e ICE iu afruan, e futën në një dhomë dhe më pas e larguan me makinë.
“Ata e tradhtuan. Ai e ka kryer dënimin e tij. Për pak sa nuk humbi jetën dhe askujt nuk i intereson. Ai meriton falje”, tha ajo.
“Ai nuk mund të dëbohet në asnjë vend ku të jetë i sigurt. Ne gjithmonë shohim pas shpine.”
Skoro mbërriti për herë të parë në SHBA në vitin 1994, duke kërkuar azil pasi kishte dezertuar nga ushtria e atëhershme jugosllave. Ai ka deklaruar se kishte qenë dëshmitar i përdhunimeve dhe vrasjeve të fëmijëve nga ushtarët.
Pas viteve të tëra të asaj që ai e përshkruan si veprimtari spiunazhi në shërbim të SHBA-së, Skoro thotë se identiteti i tij si agjent i infiltruar u zbulua dhe se u qëllua në këmbë gjatë një tentative për ta vrarë në Kosovë. Për këtë arsye ai u largua dhe në vitin 2014 hyri ilegalisht në Shtetet e Bashkuara përmes Kanadasë.
Ai përfundoi në duart e ICE në vitin 2016, pasi policia e New Yorkut e arrestoi për përdorimin e kartës së transportit publik me tarifë të reduktuar për studentë që i përkiste vajzës së tij. Ky rast solli më pas një betejë të gjatë ligjore për statusin e tij të emigracionit.
Në nëntor 2022, një gjykatës federal i ndaloi autoritetet amerikane ta dëbonin Skoron në Kosovë, për shkak të rrezikut që ai të torturohej ose vritej atje. Vendimi u bazua në traktatin ndërkombëtar të njohur si Konventa kundër Torturës, por gjykata nuk i dha atij status të ligjshëm qëndrimi të përhershëm në SHBA.
Bhairavi Desai, drejtoreshë ekzekutive e sindikatës së taksistëve ku bën pjesë Skoro, tha se ishte “e tronditur” kur mësoi se statusi i qëndrimit të shoferit, të cilin e përshkroi si “mbresëlënës, gazmor dhe të sjellshëm”, ishte kaq i pasigurt.
“Mendoja se, duke pasur parasysh punën që ai kishte bërë në luftën kundër terrorizmit në emër të CIA-s, do të kishte tashmë status të përhershëm këtu”, tha Desai për CBS News.
“Duket vërtet brutale që ta kenë përdorur në këtë mënyrë dhe tani thjesht ta flakin.”
Avokatët e Skoros, Rene Kathawala dhe Amy Greer, depozituan më 4 gusht një kërkesë për “habeas corpus”, duke argumentuar se, për shkak të mbrojtjes që ai kishte fituar me vendim gjykate në vitin 2022, ICE duhet të merrte më parë lejen e një gjykatësi për ta dëbuar, diçka që sipas tyre agjencia nuk e kishte bërë.
Këtë muaj, ICE dëboi një grup shtetasish meksikanë që kishin të njëjtën lloj mbrojtjeje si Skoro, pra shtyrjen e dëbimit në bazë të Konventës kundër Torturës. Dëbimi u krye pasi Departamenti amerikan i Shtetit mori garanci nga qeveria meksikane se personat në fjalë nuk do të pësonin dëmtime pas kthimit në vend.
Edhe procedurat për dëbimin e tyre nisën pa një kërkesë paraprake në gjykatën federale, raportoi javën e kaluar “The New York Times”.
“Ky është një tjetër rast që ngre pyetjen nëse Shërbimi i Emigracionit dhe Doganave (ICE) mundet që, pa njoftim, pa arsye dhe pa një proces të rregullt ligjor, të arrestojë në mënyrë arbitrare dhe të mbajë për një kohë të pacaktuar një shtetas të huaj që ka përfituar mbrojtje nga dëbimi sipas Konventës kundër Torturës”, thuhet në kërkesën e ndryshuar për “habeas corpus” të Skoros, të depozituar më 17 gusht.
“Përgjigjja ndaj kësaj pyetjeje është pa mëdyshje jo. Ky qëndrim është konfirmuar nga vendime gjyqësore në të gjithë vendin.”
Gjykatësi i Gjykatës Federale të SHBA-së, Robert Kirsch, urdhëroi qeverinë amerikane që të paraqesë përgjigjen e saj deri të enjten. ICE konfirmoi se kishte marrë kërkesën e CBS News për koment, por nuk dha një përgjigje. As CIA dhe as FBI nuk iu përgjigjën kërkesave për koment./CBS News
