TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Hetimet për ngarkesën prej 80 kilogramësh kokainë, e sekuestruar në muajin shkurt në portin e Vigos, kanë hyrë në një fazë të re pas ekstradimit në Spanjë të shtetasit shqiptar Klevi K., i cili dyshohet si një nga organizatorët e operacionit kriminal.
Seksioni i Dytë i Gjykatës së Shkallës së Parë të Vigos lëshoi një urdhër arresti ndërkombëtar, pasi hetimet konfirmuan se Klevi K. kishte qenë në Vigo në ditët para sekuestrimit të drogës, së bashku me dy bashkatdhetarët e tij, të cilët u arrestuan teksa tentonin të hynin në portin e Guixar për të tërhequr ngarkesën e kokainës nga një kontejner i ardhur me anije nga Amerika e Jugut.
Sipas autoriteteve, disa ditë përpara operacionit ai ishte larguar nga Vigo, pasi kishte ndihmuar në përgatitjet për nxjerrjen e drogës nga porti. Ngarkesa e sekuestruar kishte një vlerë të përllogaritur prej rreth 1.6 milionë eurosh në tregun e paligjshëm.
Sipas mediave të huaja, shqiptari u arrestua në Shqipëri gjatë muajit maj dhe, pas mbërritjes në Madrid, dha dëshmi përmes lidhjes në distancë. Megjithatë, deklarimet e tij, në vend që ta shfajësonin, sipas hetuesve vetëm sa e lidhën më tej me çështjen.
Fillimisht ai mohoi çdo përfshirje në marrjen e ngarkesës së drogës. Më pas deklaroi se kishte udhëtuar drejt Vigos për të takuar të dashurën e tij, por më vonë ndryshoi versionin duke pretenduar se ajo kishte udhëtuar bashkë me të.
Në fund, ai tha se gjatë qëndrimit në Vigo kishte takuar rastësisht në një kafene dy bashkatdhetarët e arrestuar. Këta të fundit u kapën në orët e para të mëngjesit teksa hynin në port me synimin për të marrë ngarkesën e kokainës. Sipas versionit të Klevi K., ai u përfshi në procedurat penale vetëm sepse kishte pirë kafe me ta, por gjykata nuk e pranoi këtë pretendim dhe vendosi masën e arrestit, vendim që ai nuk e apeloi.
Hetimet rrëzojnë versionin e shqiptarit
Sipas dosjes hetimore, provat e mbledhura hedhin poshtë pretendimet e tij. Autoritetet kanë dokumentuar se Klevi K. dhe dy shqiptarët e arrestuar kishin mbërritur së bashku në Vigo. Në total, në këtë operacion dyshohet se ishin të përfshirë katër shtetas shqiptarë.
Hetuesit besojnë se grupi vepronte në mënyrë të pavarur, pa bashkëpunëtorë spanjollë dhe pa pasur nevojë për persona që të monitoronin lëvizjet në portin e Guixar.
Për të gjurmuar ngarkesën, ata përdornin një pajisje sinjalizuese të fshehur mes 70 pakove të kokainës. Pajisja transmetonte sinjal, duke u mundësuar anëtarëve të grupit të ndiqnin në kohë reale lëvizjen e kontejnerit.
Kontejneri fillimisht u transportua në parkun industrial të Cambre për të dorëzuar ngarkesën legale që shërbente si mbulesë, peshk të ngrirë. Pasi u siguruan se kontejneri ishte rikthyer në portin e Vigos, të dyshuarit e mbajtën nën vëzhgim për disa ditë dhe më pas vendosën të hynin në port për të nxjerrë drogën.
Sipas hetuesve, Klevi K., i konsideruar si organizatori i operacionit, u largua nga qyteti përpara ndërhyrjes së policisë, duke ua lënë dy bashkëpunëtorëve detyrën më të rrezikshme. Ata përfunduan në pranga, ndërsa ai nuk e kishte parashikuar se hetimet spanjolle do ta çonin deri në arrestimin e tij në Shqipëri.
Hetimet drejt përfundimit
Gjykata është në pritje të raportit përfundimtar mbi të dhënat e nxjerra nga telefonat celularë të dy shqiptarëve të arrestuar në shkurt, teksa hynin në portin e Guixar përmes zonës së kontejnerëve.
Sipas autoriteteve spanjolle, ky është hapi i fundit hetimor përpara mbylljes së dosjes. Duke qenë se çështja nuk paraqitet veçanërisht komplekse krahasuar me raste të tjera të trafikut ndërkombëtar të drogës, parashikohet që procedurat të përfundojnë gjatë muajit shtator.
