BALLKAN, 27 Maj 2023, 20:52

Kurti u përgjigjet kritikëve të ndërhyrjes në Veri të Kosovës me vizitën te varri i Nënës Pashke

Kurti u përgjigjet kritikëve të ndërhyrjes në Veri

Një ditë pasi shtetet e QUINT-it, me në krye SHBA-të, dënuan hyrjen me mbrojtjen e policisë së Kosovës të drejtuesve të rinj vendorë në komunat me shumicë serbe, kryeministri i Republikës së Kosovës, Albin Kurti, nderoi kujtimin e Nënës Pashke Krasniqi Markaj. 

Ai së bashku me studiuesen Nora Visoka Weller dhe shkrimtarin Ag Apolloni, bëri homazhe te varri dhe vendi i vetëflijimit të Nënës Pashke dhe vizitoi familjen Markaj në Gjakovë.

Bashkë me familjarët e saj përkujtuan Nënën Pashke, e cila ditën e 27 majit 2003, i vuri flakën vetës pasi ia kthyen trupat e djemve, Gjovalinit dhe Milanit, të vrarë dhe zhdukur me forcë nga Serbia.

Gjovalin dhe Milan Markaj ishin mes 374 të vrarëve më 27 prill 1999, në masakrën e kryer nga forcat e Serbisë në fshatrat Mejë dhe Korenicë të Gjakovës dhe ishin të zhdukur deri në vitin 2003.

Kurti u përgjigjet kritikëve të ndërhyrjes në Veri

Ata u gjetën në varrezën masive në Batajnicë të Serbisë. Më 24 maj 2003 u bë rivarrimi i Gjovalinit dhe Milanit.

Tri ditë më pas, pasi e kreu të pamën, nëna Pashke i vuri flakën vetes, për t’i dhënë fund jetës së saj dhe dhimbjes për të bijtë. Në këtë 20-vjetor, Kryeministri Kurti tha se qëndresa dhe sakrifica e Nënës Pashke mbesin të paharruara. Ai theksoi se krimet e Serbisë në Kosovë nuk mund të harrohen e as falen.