TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Avokati ynë shumë i ditur, siç e kemi përmendur vazhdimisht edhe shumë i njohur, Spartak Ngjela, nëpërmjet një statusi shumë të rëndësishëm, të lëshuar orët e fundit, i bën Prokurorit të Përgjithshëm, të sapozgjedhur, tetë pyetje thelbësore, ku duhet të mbështetet zbulimi i të vërtetës, në krimin post-tërmetor të Durrësit.
- Edi Rama është lëshuar si i çmendur për të fshehur gjurmët e krimit në Durrës. Po prokurorët do të shiten, apo do të tremben në këtë rast hetimor? - pyet avokati ynë i mençur dhe më pas përgjigjet po vetë. Kjo do të varet nga forca që do të tregojë Prokurori i Përgjithshëm, thotë ai.
- Sa pallate u janë rrëzuar shitësve familjarë të Ramës, Berishës dhe Metës, në plazhin e Durrësit? - pyet avokati ynë i ditur.
- Sa apartamente kanë disponuar familjarët e Ramës, Berishës dhe Metës?
- Sa janë përfshirë gratë dhe fëmijët e kryeministrave, në tregun e ndërtimit në plazhin e Durrësit?
- Kur është shitur bregdeti dhe nga cili kryeministër?
Këto dhe disa pyetje të tjera, përbëjnë thelbin e apelit të madh të avokatit tonë, drejtuar Kryeprokurorit të ri, Olsian Çela.
- Zoti Prokuror i Përgjithshëm, ju mendoni se unë po ju pyes kot? Jo, unë nuk pyes kot dhe i ngre këto pyetje, që t'i hetojë edhe gazetaria.
- Krimi i bashkëpunimit korruptiv të politikës së lartë, duhet të hetohet domosdoshmërisht, kjo është kërkesë imperative e kësaj kohe historike, - përfundon statusin e tij në formë thirrje, avokati ynë i ditur, zëdhënësi i FBI-së, por edhe i Departamentit të Shtetit, kur në rajon mungon Palmeri.
Për t'u qartësuar edhe më mirë, me pyetjet e avokatit, për Prokurorin e ri të Përgjithshëm, lexoni statusin e mëposhtëm.
/TPZ.al/Tej e këtej/
SPARTAK NGJELA - FAQJA ZYRTARE
Prokurori i ri i Përgjithshëm duhet ta dijë që, nëse e realizon hetimin e imët të krimit të madh shtetëror me mafien e ndërtimit në Durrës dhe Tiranë, i ka bërë Shqipërisë shërbimin më të madh në njëqind vjet.
Por, edhe karierës së tij në Shqipëri. Ai dhe ekipi i tij do të jenë pa dyshim drejtuesit moralë të shtetit shqiptar në një të ardhme të afërt. Por, a e kuptojnë dot këtë prokurorët shqiptarë!
Zhvillimi shqiptar sot kërkon moralitet dhe duhet ta kuptojnë të gjithë që moraliteti vendoset me anë të ligjit. Mungesa e ndëshkimit ka shtypur ligjin dhe legjitimitetin në Shqipëri, prandaj, ndëshkimi i autorëve të këtij krimi të madh, fillon etapën historike të vendosjes së moralitetit në drejtimin e shtetit shqiptar.
Çfarë po fshihet në krimin e Durrësit?
Nga shqetësimi i kryeministrit shqiptar, dhe nga gënjeshtrat e tij për historinë e pallateve të rrëzuar kuptohet se ai, vetë ose familjarisht, është i përfshirë në këtë krim të madh.
Por, të shqetësuar janë gjithashtu edhe Saliu, Meta dhe Basha, kuptohet që janë të përfshirë në pallatet e rrëzuar.
Kjo është gjendja e krimit, prandaj Rama është lëshuar si i çmendur për të zhdukur gjurmët. Po prokurorët, do të shiten apo do të tremben në këtë rast hetimor? Kjo do të varet nga forca që do të tregojë Prokurori i Përgjithshëm.
Në çdo hetim ngrihen pyetjet thelbësore ku duhet të mbështetet zbulimi i së vërtetës.
Në lidhje ne këtë çështje hetimore që ka filluar nga prokuroria, pyetjet që unë i ngre Prokurorit të Përgjithshëm dhe prokurorëve të hetimit janë këto:
Sa pallete iu janë rrëzuar shitësve familjarë të Ramës, Berishës dhe Metës në Plazhin e Durrësit?
Ku është gjetur pronësia mbi truallin në bregdet, dhe, si e ka historinë kjo pronësi në breg të detit, kur dihet se bregdeti ka qenë tokë shtetërore absolute?
Kur është shitur bregdeti, nga cili kryeminister, dhe si?
Cilat janë firmat e ndërtimit dhe pronarët e parë të pallateve të rrëzuar?
Çfarë lidhje kanë këto firma ndërtimi me kryeministrat Berisha, Rama dhe Meta?
Nga sa aparranente kanë disponuar familjarët e Ramës, Berishës dhe Metës në pallatet e rrëzuar, por edhe në ata që nuk janë rrëzuar nga tërmeti i 26 nëntorit?
Sa janë përfshirë gratë dhe fëmijët e kryeministrave në tregun e ndërtimit në plazhin e Durrësit, dhe si?
Zoti Prokuror i Përgjithshëm; këto janë pyetjet që ngrenë shqiptarët sot. Çfarë mendoni për këto pyetje, a do të marrin një përgjigje që t'i qëndrojë të vërtetës?
Zoti Prokuror i Përgjithshëm; ju mendoni se unë po pyes kot?
Jo, unë nuk pyes kot, dhe i ngre këto pyetje që t'i hetojë edhe gazetaria.
Edhe gazetarët, televizionet dhe gazetat që do t'i japin me fakte përgjigjet e pyetjeve të më sipërme, do të lansohen në historinë e shpejtë të Shqipërisë. Të tjerat medie që do t'i fshehin, sigurisht që do të ndëshkohen bashkë me të inkriminuarit në këtë krim shtetëror.
Krimi i bashkëpunimit korruptiv të politikës së lartë me mafien e ndërtimit, duhet të hetohet domosdoshmërisht; kjo është kërkesë imperative e kësaj kohe historike.
