TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Anthony Joshua kaloi me sukses provën e fundit me shqiptarin Kristian Prenga përpara supersfidës së shumëpritur me Tyson Fury në muajin nëntor, por jo pa vuajtje. Ndonëse fitoi, boksieri britanik u rrëzua dy herë në tapet në raundin e parë nga Prenga, duke qenë shumë pranë një humbjeje shokuese.
Joshua arriti të përmbyste gjithçka me një nokaut të fuqishëm në raundin e dytë. Goditja vendimtare e la Prengën të shtrirë në tapet, i kapur mes litarëve të ringut, duke i dhënë fitoren ish-kampionit të botës dhe duke shmangur një poshtërim që do të rrezikonte edhe duelin e shumëpritur me Tyson Fury.
Pas tre minutave të para të ndeshjes, përballja e planifikuar me Fury dukej se ishte në prag të dështimit. Joshua, megjithatë, reagoi me vendosmëri dhe arriti të rikthehej, duke shpëtuar jo vetëm këtë sfidë, por edhe vazhdimësinë e karrierës së tij. Kjo ishte ndeshja e parë e Joshua që prej aksidentit automobilistik të dhjetorit të kaluar, ku humbën jetën dy nga miqtë e tij më të ngushtë, Sina Ghami dhe Latif Ayodele.
Për këtë duel, britaniku ishte përgatitur me Oleksandr Usyk dhe ekipin e tij, duke synuar të përfitonte nga eksperienca e ish-rivalit të tij. Vetëm 20 sekonda pas sfidës, Prenga e befasoi me një goditje të fortë "uppercut" me të djathtën, që e rrëzoi menjëherë në tapet. Joshua u ngrit i tronditur dhe, në mesin e raundit, vazhdonte të kishte vështirësi në ekuilibër. Rreth 30 sekonda para fundit të raundit të parë, shqiptari e rrëzoi sërish, duke e vendosur shumë pranë humbjes.
Por Joshua reagoi në fund të raundit dhe hyri në të dytin me një tjetër ritëm. Ai e vuri menjëherë në vështirësi Prengën, i cili nisi të tërhiqej pas goditjeve të britanikut. Pak çaste më vonë, Joshua e mbylli ndeshjen me një nokaut spektakolar, duke siguruar fitoren dhe duke mbajtur gjallë supersfidën e shumëpritur ndaj Tyson Fury.
Ndeshja
Ish-kampioni britanik i botës u rikthye nga një raund i parë katastrofik për të fituar me nokaut në raundin e dytë, në një duel dramatik që mbajti në ankth mijëra tifozë në Xhedah dhe miliona të tjerë para ekranit.
Askush nuk e priste atë që ndodhi në tre minutat e para. Prenga hyri në ring pa asnjë kompleks inferioriteti dhe dominoi plotësisht ish-kampionin e botës. Me një seri goditjesh të fuqishme, shqiptari e vuri Joshua-n në vështirësi të mëdha, duke e rrëzuar në tapet disa herë gjatë raundit të parë. Britaniku u shpëtua nga përvoja, këmbëngulja dhe gongu, pasi raundi ishte pa diskutim në favor të boksierit shqiptar.
Arena mbeti e shtangur. Joshua dukej i tronditur dhe për herë të parë pas shumë vitesh u pa në prag të një humbjeje të bujshme. Prenga kontrolloi ritmin, imponoi forcën e tij dhe i dha publikut një demonstrim të nivelit të lartë që kishte arritur.
Por në raundin e dytë gjithçka ndryshoi
Joshua u rikthye në ring me një qasje krejt tjetër, më i qetë dhe më i kujdesshëm. Britaniku nisi të shfrytëzonte përvojën e tij, duke gjetur distancën e duhur dhe duke goditur me kombinime gjithnjë e më të sakta. Prenga provoi të ruante të njëjtin ritëm, por gradualisht filloi të humbiste terren përballë reagimit të kundërshtarit.
Në momentin vendimtar, Joshua goditi me një të djathtë të fuqishme që lëkundi shqiptarin. Pasoi një seri goditjesh të tjera dhe një tjetër e djathtë e pastër e dërgoi Prengën në tapet. Arbitri ndërhyri menjëherë, duke ndalur sfidën dhe duke i dhënë fitoren me nokaut britanikut.
Pavarësisht humbjes, Kristian Prenga largohet nga kjo përballje me kokën lart. Ai i dhuroi Anthony Joshua-s një nga raundet më të vështira të karrierës së tij dhe tregoi se mund të rivalizojë me emrat më të mëdhenj të peshave të rënda.
Për Joshua-n, kjo fitore e rikthen fuqishëm në garën për duelet më të mëdha të divizionit, ndërsa për Prengën mbetet krenaria e një paraqitjeje që për pak çaste bëri të besonte gjithë botën e boksit se mrekullia shqiptare ishte shumë pranë.
Pas fitores me nokaut ndaj Kristian Prengës, Anthony Joshua dhuroi një moment simbolik në ring, duke kërkuar një flamur shqiptar dhe duke e ngritur atë në fund të duelit.
Ish-kampioni britanik i botës mbajti në njërin krah flamurin shqiptar, në nderim të kundërshtarit të tij dhe tifozëve të shumtë në stadium, ndërsa në krahun tjetër flamurin anglez që përfaqëson. Momenti u prit me entuziazëm nga tifozët dhe u pa si një gjest respekti ndaj boksierit shqiptar.
Joshua fitoi me nokaut në raundin e dytë, pas një dueli dramatik ku Prenga e befasoi në raundin e parë, duke e vënë disa herë në vështirësi britanikun dhe duke i dhënë atij një nga momentet më të vështira në ring.
Megjithatë, eksperienca e Joshuas bëri diferencën. Në raundin e dytë, ai reagoi, mori kontrollin e sfidës dhe me një seri goditjesh të sakta e dërgoi Prengën në tapet, duke detyruar arbitrin të ndërpresë përballjen.
Pavarësisht humbjes, Kristian Prenga la një përshtypje të fortë me paraqitjen e tij, ndërsa Joshua, përveç fitores, zgjodhi ta mbyllte mbrëmjen me një mesazh respekti për kundërshtarin shqiptar.
The respect is always there ?#JoshuaPrenga ? pic.twitter.com/6QiPhGacal
— DAZN Boxing (@DAZNBoxing) July 25, 2026
