TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një 55-vjeçare ka humbur jetën sot në Skrapar, ndërsa liderët e opozitës, Sali Berisha dhe Ilir Meta thonë se ajo ka vdekur në tentativë për të kaluar lumin, pasi ura është e prishur.
Berisha dhe Meta me anë të një postimi në Facebook thonë se braktisja e njerëzve të kësaj zone dhe mungesa e urës u bënë shkaktarë të humbjes së jetës!
Ndërkohë policia në një njoftim zyrtar thotë se gruaja ka humbur jetën pasi është vetëmbytur në ujërat e lumit Rehovë në Skrapar.
“Trupi i pajetë i 55-vjeçares është nxjerrë nga uji, dhe nga këqyrja paraprake e trupit të viktimës, nuk janë konstatuar shenja dhune”, thotë policia, qe thekson se për gruan ishte ishte njoftuar nga bashkeshorti i saj se eshte larguar nga banesa.
“Nga deklarimet e familjarëve shtetasja Sh.Ll., prej disa kohësh kishte shfaqur shenja depresioni, dhe në vazhdimësi ishte shprehur se do të mbytej në lumë”, sqaron policia.
Postimi i Ilir Metës
Ngushëllimet më të sinqerta për familjen Llari nga Rehova e Skraparit për humbjen e njeriut të tyre të dashur në përpjekje për të kaluar lumin e Tomorricës!
Braktisja e njerëzve të kësaj zone dhe mungesa e urës u bënë shkaktarë të humbjes së jetës!
Me papërgjegjshmërinë dhe hajdutërinë e saj “Rilindja” po bëhet shkaktare e këtyre tragjedive!
Postimi i Sali Berishës
Për këtë urë në Skrapar u mbyt një njeri! Njerëz të braktisur! sb
Njoftimi i Policisë
Më datë 21.01.2023, në fshatin Gjerbës, Skrapar, në ujërat e lumit në fshatin Rehovë, Skrapar, dyshohet se është vetëmbytur në ujë, shtetasja Sh.Ll., 55 vjeçe, banuese në fshatin Rehovë, Skrapar.
Trupi i pajetë i 55-vjeçares është nxjerrë nga uji, dhe nga këqyrja paraprake e trupit të viktimës, nuk janë konstatuar shenja dhune.
Për shtetasen Sh.Ll., më datë 21.01.2023, ka njoftuar bashkëshorti i saj se është larguar nga banesa. Nga deklarimet e familjarëve shtetasja Sh.Ll., prej disa kohësh kishte shfaqur shenja depresioni, dhe në vazhdimësi ishte shprehur se do të mbytej në lumë.
Grupi hetimor po punon për sqarimin e plotë të rrethanave të ngjarjes.
Materialet i kaluan Prokurorisë pranë Gjykatës së Shkallës së Parë Berat, për veprime të mëtejshme.
