TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Pas katër muajve në kërkim, policia ka vënë në pranga personin që dyshohet se lëshoi një granatë shpërthyese në një biznes në Lezhë, ngjarje e ndodhur në prill të këtij viti.
Shtetasi A. Z., kërkohej nga efektivët, pasi gjykata kishte vendosur për të masën e sigurisë “arrest me burg”, për veprat penale “” Vrasja me dashje”, mbetur në tentative” dhe “Mbajtja pa leje dhe prodhimi i armëve, armëve shpërthyese dhe i municionit”.
A.Z., dyshohet se ka lëshuar një ndezës granate në drejtim të shtetasit S. P., i cili ka shpërthyer dhe ka shkaktuar dëme materiale. Shtetasi S.P., mësohet se ka qenë edhe objektivi i sulmit.
Pas ngjarjes, 36-vjeçari S.P., është larguar pa njoftuar policinë, por u arrestua disa orë më vonë dhe ndaj tij është ngritur akuza e moskallëzimit të krimit.
Njoftimi i policisë:
DVP Lezhë/Vijojnë operacionet për lokalizimin e kapjen e personave të shpallur në kërkim, si dhe vendosjen e tyre përpara përgjegjësisë ligjore.
Finalizohet operacioni policor i koduar “Fitili”. I kërkuar nga Policia pasi i lëshoi një shtetasi, një ndezës granate, brenda një biznesi, vihet në pranga 46-vjeçari.
Në zbatim të planit të masave për parandalimin e ngjarjeve kriminale, goditjen e paligjshmërive dhe kapjen e vendosjen përpara përgjegjësisë ligjore të personave në kërkim, strukturat hetimore dhe operacionale të DVP Lezhë, në bashkëpunim të ngushtë me komisariatet e Policisë në varësi të DVP-së, si dhe me Policinë Rrugore, kanë organizuar kontrolle të befasishme në të gjithë qarkun. Si rezultat i kontrolleve, bazuar edhe në informacionet e siguruara në rrugë operative, u organizua dhe u finalizua operacioni policor i koduar “Fitili”, në kuadër të të cilit u lokalizua, u kap dhe u ndalua shtetasi:
-Admir Zogaj, 46 vjeç, banues në Manati.
46-vjeçarit të kërkuar i ishte caktuar nga Gjykata e Rrethit Gjyqësor Lezhë, masa e sigurisë “Arrest në burg”, për veprat penale ” Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”, pasi në muajin prill të këtij viti, në një restorant në Lezhë, ka lëshuar një ndezës granate në drejtim të shtetasit S. P., i cili ka shpërthyer dhe ka shkaktuar vetëm dëme materiale.
Kontrollet e befasishme për parandalimin e ngjarjeve kriminale dhe goditjen e paligjshmërisë do të vijojnë në të gjithë qarkun, krahas angazhimit maksimal për mbarëvajtjen e sezonit turistik.
