SPORT, 8 Mars 2023, 17:26

Seria A “kopjon” suksesin e Premier Ligës, plan që kampionati të luhet edhe në datën e pazakontë

Seria A “kopjon” suksesin e Premier Ligës, plan që

Futbolli italian kërkon të ringrihet financiarisht për t’iu afruar sadopak Premier Ligës që ka krijuar një diferencë të frikshme dhe duket se drejtuesit e Ligës italiane, po mendojnë rimodelimin e kampionatit që të ngjajë me atë anglez.

Të hënën do të ketë një mbledhje të Asamblesë së Ligës së Futbollit në Itali dhe ideja e drejtuesve është që të afrojnë sa më shumë financime. Kështu, përveç sponsorëve të ndryshëm që mund të bëhen pjesë e aktivitetit, do të shqyrtohet edhe ideja që kampionati të shtrihet deri në fundin e vitit.

Plani është që të luhet edhe pas Krishtlindjeve, deri më 30 dhjetor, pak a shumë si anglezët të cilët nuk ndalen as në festa e fundvitit. Një formulë që u ka rritur shikueshmërinë britanikëve dhe tashmë italianët po mundohen ta kopjojnë duke menduar se kështu mund të ngjallin më shumë interes edhe te kompanitë e transmetimeve televizive për të siguruar më shumë të ardhura.