TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Këshilli Bashkiak i Belshit ka votuar këtë të hënë kundër propozimit për bashkimin me Bashkinë Elbasan dhe Cërrik, në kuadër të diskutimeve për Reformën Administrativo-Territoriale.
Në mbledhjen maratonë, këshilltarët bashkiakë diskutuan gjatë mbi propozimin për ndryshimin e organizimit territorial dhe pasojat që një bashkim i mundshëm do të kishte për administrimin vendor, zhvillimin ekonomik dhe perspektivën e Belshit.
Nga 21 anëtarët që përbëjnë Këshillin Bashkiak të Belshit, 7 votuan kundër, ndërsa pjesa tjetër abstenuan.
Procesi i votimit u shoqërua edhe me debate politike. Një prej këshilltareve të opozitës reagoi ndaj mënyrës së votimit të grupit të këshilltarëve të mazhorancës, duke ngritur pikëpyetje mbi votimin e unifikuar të tyre.
Një pjesë e rëndësishme e diskutimeve u përqendrua te zhvillimi që ka njohur Belshi gjatë dekadës së fundit, pas Reformës Administrativo-Territoriale dhe përfshirjes së ish-komunave në njësinë e re vendore.
Gjatë mbledhjes, këshilltarët vunë në dukje transformimin e zonës dhe rritjen e potencialit të saj ekonomik, bujqësor dhe turistik.
Liqenet e Belshit dhe peizazhi natyror janë ndër elementët që kanë ndikuar në rritjen e interesit turistik për zonën, e cila sot shihet si një prej territoreve me potencial zhvillimi në Qarkun e Elbasanit.
Qëndrimi i Këshillit Bashkiak të Belshit vjen në një kohë kur Reforma Administrativo-Territoriale ka hapur diskutime në disa bashki të Qarkut Elbasan.
Me votën e sotme, Këshilli Bashkiak i Belshit shprehu kundërshtimin ndaj propozimit për bashkimin me Elbasanin dhe Cërrikun, duke e vendosur të ardhmen territoriale të bashkisë në qendër të debatit publik dhe institucional.
