TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një 22-vjeçar shqiptar dyshohet se po planifikonte të ndërtonte një bombë dhe ta shpërthente brenda një qendre tregtare të mbushur me njerëz në Itali, ndërsa zona e Venetos ishte përcaktuar si një objektiv i mundshëm. I riu, i cili kishte mbërritur nga Tirana në aeroportin Canova të Trevisos, është ndaluar nga autoritetet dhe më pas është dëbuar nga Italia.
Sipas medias italiane, 22-vjeçari ishte prej kohësh nën vëzhgimin e forcave të rendit për shkak se ishte radikalizuar online dhe për këtë arsye gjurmohej nga sistemet e inteligjencës. Ai kishte siguruar informacione dhe materiale që mund të shërbenin për ndërtimin e një bombe.
Dëbimi i tij u konfirmua nga ministri i Brendshëm italian, Matteo Piantedosi, i cili tha se masa ishte marrë për arsye të sigurisë së shtetit dhe parandalimit të terrorizmit.
“Është dëbuar nga Italia për arsye të sigurisë së shtetit dhe parandalimit të terrorizmit. Konsiderohet i rrezikshëm bazuar në provat e dala nga veprimtaria informative dhe hetimore. Masa, e marrë me propozim të Drejtorisë Qendrore të Policisë së Parandalimit, është pjesë e veprimtarisë kundër çdo forme radikalizimi dhe kërcënimi në vendin tonë”, shkroi Piantedosi në rrjetet sociale.
Postimi i ministrit shoqërohej edhe me një imazh ku shkruhej me germa të mëdha “Treviso”.
Sipas informacioneve të raportuara nga media italiane pas postimit të Piantedosit, dyshohet se është parandaluar një sulm i mundshëm terrorist, i cili do të kryhej në një vend të mbushur me punonjës dhe familje.
22-vjeçari kishte mbërritur nga Tirana vetëm të dielën në aeroportin Canova të Trevisos, si një prej turistëve të shumtë që gjatë këtyre javëve vizitojnë sheshet, plazhet dhe malet e rajonit.
Zyrtarisht, ai kishte deklaruar se do të vizitonte disa të afërm që jetonin jashtë Venetos, duke e paraqitur qëndrimin në zonën e Trevisos vetëm si një ndalesë gjatë udhëtimit.
Por nga informacionet që nisën të dalin pas njoftimit të ministrit të Brendshëm, rezultoi se autoritetet kishin zbuluar edhe një synim të dyshuar për ndërtimin e një bombe dhe shpërthimin e saj brenda një qendre tregtare në Itali. Zona e Venetos përmendej si objektivi i mundshëm.
Sipas të njëjtave informacione, një pjesë e materialeve të nevojshme për realizimin e planit ishte blerë tashmë. I riu ishte dokumentuar gjithashtu për mënyrat se si ndërtohej një pajisje shpërthyese.
Bomba, megjithatë, nuk ishte ndërtuar ende në momentin kur ndërhynë autoritetet.
Media italiane raporton se 22-vjeçari dukej se ishte ende në një fazë fillestare të procesit të radikalizimit dhe ishte afruar me ide ekstremiste, megjithëse kishte zhvilluar tashmë një plan konkret.
I riu mbërriti në aeroportin Canova gjatë së dielës dhe u mor menjëherë në ngarkim nga forcat e rendit të Trevisos. Vetëm një ditë më pas, të hënën, masa e dëbimit ishte ekzekutuar sipas vendimit të Ministrisë së Brendshme italiane.
