AKTUALITET, 27 Nëntor 2022, 12:12

Berisha lë sallën e parlamentit kur nis të flasë Rama: I ka futur thika pas shpine Kosovës!

Berisha lë sallën e parlamentit kur nis të flasë Rama: I ka

Në Tiranë po mbahet një mbledhje e përbashjët e të dy parlamenteve.

Takimi bëhet me rastin e 110-vjetorit të shpalljes së Pavarësisë. Sapo nisi fjalën kryeministri Rama, ka dalë nga salla, kryetari i PD-së, Sali Berisha. Përpara gazetarëve Berisha akuzoi Ramën se i ka futur thika pas shpine Kosovës.

“Në platformën e këtij parlamenti, po flet njëri nga dy armiqtë kryesorë të qenies së shqiptarëve që nga themelimi deri më sot. Një nga armiqtë më kryesorë të Kosovës, njeriu i njohur botërisht si avokati më i shpifur i padronit të tij, Aleksandër Vuçiç. Njeriu që në vend që të bëjë avokatinë e Kosovës, të mbrojë interesat legjitime të saj, kalon nga samiti në samit duke lobuar për Vuçiçin dhe Rusinë e vogël në zemër të Ballkanit, Serbinë.

Edi Rama ka futur thika pas shpine ndaj Kosovës në mënyrë të vazhdueshme. Ai u përpoq të zhbëjë arritjet e saj, përfshirë këtu edhe skenarët për ndarjen e saj me Aleksandër Vuçiç. Për të justifikuar vasalitetin ndaj Vuçiçit, ai kërcënon me luftën e Vuçiçit. Në të gjithë këto qëndrime, ai rezulton të jetë një antishqiptar i rrezikshëm për kombin shqiptar.

Fakti që u largova nga parlamenti, u largova për të përfaqësuar kombin shqiptar. Të gjithë qytetarët e Kosovës që ndjehen të tradhtuar nga një kryeministër shqiptar. U largova për të përfaqësuar ndjenjat e dhjetëra-mijëra familjeve shqiptare që kanë humbur familjet e tyre nga barbaritë serbe. Edi Rama prej katër muajsh, nuk lejon votimin e rezolutës për dënimin e gjenocidit serb në Kosovë.

U largova për të përfaqësuar ata dhjetëra-mijëra shqiptarë qau larguan nga Shqipëria prej politikave çnjerëzore të Edi Ramës. Të gjitha këto janë arsyet që nuk mund të pranoja të dëgjoja ligjëratën e një njeriu, që pas Enver Hoxhës është armiku më i egër i kombit shqiptar” – tha Berisha.