TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një gjykatë federale në SHBA ka rrëzuar politikën e Departamentit të Shtetit që pezullonte përpunimin e vizave emigruese për shtetasit e 75 vendeve, mes tyre edhe Shqipëria.
Gjykatësja federale Jeannette Vargas, në Manhattan, e konsideroi politikën të paligjshme, duke argumentuar se ajo bie ndesh me ligjin federal të emigracionit. Sipas vendimit, Departamenti i Shtetit nuk mund të ndalojë në mënyrë kategorike lëshimin e vizave emigruese vetëm mbi bazën e kombësisë së aplikantëve.
“Politika, e cila ndalon kategorikisht lëshimin e vizave emigruese bazuar në kombësinë e aplikantit, përfaqëson një shfuqizim të drejtpërdrejtë të kësaj skeme ligjore”, shkroi gjykatësja Vargas në vendimin e saj.
Politika, e vendosur në fuqi në janar, prekte shtetas nga 75 vende të botës. Përveç Shqipërisë, në listë përfshiheshin edhe vende të tjera të Ballkanit, si Bosnja dhe Hercegovina, si dhe shtete të Amerikës Latine, mes tyre Brazili, Kolumbia dhe Uruguai. Masat prekën gjithashtu vende të Azisë Jugore, përfshirë Pakistanin dhe Bangladeshin.
Departamenti i Shtetit e kishte justifikuar pezullimin me argumentin se aplikantët nga këto vende paraqisnin rrezik më të lartë për t'u bërë “barrë publike” në SHBA dhe për të përdorur burimet e qeverive lokale, shtetërore dhe federale.
Vendimi i gjykatës federale përbën një goditje për këtë politikë të administratës Trump dhe mund të ndikojë drejtpërdrejt te qytetarët shqiptarë që kanë aplikuar ose presin përpunimin e vizave emigruese drejt Shteteve të Bashkuara.
Megjithatë, vendimi i gjykatës lidhet me pezullimin e përpunimit të vizave emigruese dhe nuk do të thotë automatikisht se çdo aplikant shqiptar do të marrë vizë. Aplikimet vijojnë t'i nënshtrohen kërkesave dhe procedurave të përcaktuara nga ligji amerikan i emigracionit.
Administrata e Presidentit Donald Trump ka ndjekur një politikë më të ashpër ndaj emigracionit, duke e argumentuar atë me nevojën për forcimin e sigurisë dhe kontrollit të sistemit të emigracionit. Organizatat e të drejtave të emigrantëve, ndërkohë, kanë kundërshtuar disa prej masave, duke ngritur shqetësime për respektimin e të drejtave kushtetuese dhe trajtimin e barabartë të aplikantëve.
