TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Të paktën shtatë persona janë plagosur dhe rreth 300 të tjerë janë evakuuar nga një kamping, pas shirave të rrëmbyeshëm që përfshinë gjatë natës verilindjen e Spanjës. Tre persona u plagosën pasi një mur u shemb në portin e Ronda de Berà, rreth 75 kilometra në jugperëndim të Barcelonës. Sipas autoriteteve, njëri prej të plagosurve ndodhet në gjendje më të rëndë se të tjerët.
Katër persona të tjerë u dërguan në spital pas incidenteve të ndryshme të shkaktuara nga moti i keq. Mes tyre ishin edhe dy persona që pësuan plagë të lehta pasi një tjetër mur u shemb në një kamping në Ronda de Berà. Rreth 300 persona që po qëndronin në kamping u evakuuan për shkak të përmbytjeve dhe rrezikut nga shembjet. Rreth 100 prej tyre u strehuan përkohësisht në një palestër komunale.
Shërbimet e emergjencës u përballën me rreth 200 incidente, kryesisht raste të personave të bllokuar brenda automjeteve në rrugët e përmbytura. Në El Vendrell, qytet me rreth 40 mijë banorë, zona bregdetare u mbulua nga më shumë se gjysmë metri ujë. Përmbytje u raportuan edhe në disa rrugë të komunave fqinje, përfshirë Coma-Ruga dhe Torredembarra.
Sipas shërbimit meteorologjik lokal, disa zona të Katalonjës regjistruan më shumë se 100 litra shi për metër katror, ndërsa në disa pjesë të bregdetit ranë deri në 200 litra shi për metër katror brenda vetëm pak orësh. Autoritetet vijojnë të monitorojnë situatën, ndërsa ekipet e emergjencave janë angazhuar për të përballuar pasojat e reshjeve intensive dhe për të ndihmuar personat e prekur nga përmbytjet.
Lluvias torrenciales en Tarragona: hay al menos 1 herido crítico y 400 personas evacuadas pic.twitter.com/9QgmBDndq7
— Noticias Cuatro (@noticias_cuatro) August 22, 2026
