TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Sekretari i Përgjithshëm i OKB-së, António Guterres, u ka bërë thirrje liderëve botërorë që t’u japin fund luftërave dhe të rikthejnë paqen.
Duke folur për Euroneës në Bishkek të Kirgistanit, në kuadër të samitit të Organizatës së Bashkëpunimit të Shangait, Guterres tha se disa nga aktorët kryesorë të konflikteve në Ukrainë dhe Lindjen e Mesme ndodheshin në të njëjtën tryezë.
“Është koha t’i japim fund kësaj çmendurie. Është koha për paqe. Disa nga aktorët kryesorë të këtyre proceseve janë këtu”, tha Guterres.
Ai shprehu shqetësim për konfliktet që, sipas tij, duket se nuk kanë fund, duke përmendur luftën mes Rusisë dhe Ukrainës, si dhe përplasjet në Lindjen e Mesme, përfshirë konfliktin në Gaza dhe përballjen mes Iranit dhe Shteteve të Bashkuara.
Sa i përket Iranit, Guterres tha se sulmet kanë rifilluar dhe bëri thirrje për rikthimin e negociatave.
“Fatkeqësisht, sulmet kanë filluar përsëri. Prandaj mendoj se nevojitet përmbajtje maksimale”, tha ai.
Sipas Guterres, negociatat mes palëve kishin qenë pranë një marrëveshjeje dhe duhet të rifillojnë.
“Le të rifillojmë ato dhe të sigurohemi që të krijojmë një situatë paqeje dhe stabiliteti në rajon”, u shpreh ai.
Guterres kërkoi gjithashtu rikthimin e lirisë së lundrimit në Ngushticën e Hormuzit dhe në Bab el-Mandeb, duke theksuar rëndësinë e këtyre rrugëve për transportin ndërkombëtar.
Gjatë vizitës në Bishkek, kreu i OKB-së foli edhe për rëndësinë e bashkëpunimit me organizatat rajonale. Ai tha se bota po bëhet gjithnjë e më shumë shumëpolare dhe se OKB-ja duhet të mbajë dialog me organizata si Bashkimi Evropian, Bashkimi Afrikan dhe Organizata e Bashkëpunimit të Shangait.
Organizata e Bashkëpunimit të Shangait po shënon 25-vjetorin e saj. Ajo përfshin 10 vende anëtare, mes tyre Kinën, Rusinë, Indinë, Iranin dhe Pakistanin, të cilat së bashku përfaqësojnë më shumë se 40% të popullsisë së botës.
Në samit marrin pjesë edhe liderë të rëndësishëm, mes tyre presidenti turk Recep Tayyip Erdoğan, presidenti kinez Xi Jinping, presidenti rus Vladimir Putin, kryeministri indian Narendra Modi dhe presidenti iranian Masoud Pezeshkian.
Guterres tha se organizata përfaqëson një pjesë shumë të madhe të njerëzimit dhe se dialogu me të është i rëndësishëm për OKB-në.
