TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ish-sulmuesi i Liverpoolit, Newcastle dhe Anglisë, Andy Carroll, ka zbuluar në autobiografinë e tij se është sulmuar seksualisht nga një burrë në vitin 2021 dhe se ende po përpiqet të përballojë pasojat e kësaj përvoje të vështirë.
Autobiografia e Carroll, e titulluar “Duke e zotëruar”, u botua të enjten. Në të, 37-vjeçari anglez përshkruan me detaje sulmin e ndodhur në shtëpinë e tij në Newcastle, për të cilin autori i krimit u dënua me tre vjet burgim.
“Disa vite më parë më ndodhi diçka aq traumatike sa vendosa ta përfshij në këtë libër vetëm në minutën e fundit”, shkroi ai në libër, fragmente të të cilit janë botuar në shtypin britanik.
“Më sulmuan seksualisht, ja ku e thashë. Është e frikshme edhe ta mendosh dhe vetëm pak njerëz e dinin deri më tani.”
Carroll rrëfen se e kishte të vështirë të fliste për atë që kishte ndodhur, përpara se të vendoste më në fund ta përfshinte ngjarjen në autobiografi, pas bisedave të gjata me të dashurën e tij.
Dhimbja mendore vazhdoi edhe shumë kohë pas sulmit. Ngjarja ndodhi pasi një mik i ish-partnerit të tij shkoi në shtëpinë e tij për të parë një ndeshje boksi dhe ishte planifikuar të qëndronte aty gjatë natës.
“Ajo që më ndodhi ndikoi në çdo aspekt të jetës sime. Mendoja për të çdo ditë, duke e bërë të vështirë përqendrimin në çdo gjë tjetër, përfshirë futbollin”, tha ai. “Trauma e asaj që më ndodhi nuk është zhdukur.”
Karriera e Carroll
Carroll u transferua nga Newcastle te Liverpooli në janar të vitit 2011 për 35 milionë paund. Në atë kohë, ai ishte transferimi më i shtrenjtë britanik në historinë e Premier Ligës.
Ai luajti gjithashtu për West Ham në Premier League dhe shënoi dy gola për Anglinë, përfshirë një gol në Kampionatin Evropian të vitit 2012.
Në fund të karrierës së tij profesionale, Carroll luajti për një periudhë të shkurtër në Francë me Amiens dhe Bordeaux, përpara se t’i bashkohej Dagenham dhe Redbridge, skuadër jo-ligore në Angli, me të cilën shënoi gjashtë gola sezonin e kaluar.
