TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Qeveria italiane miratoi të martën, më 20 tetor 2026, një dekret të ri për sigurinë, duke parashikuar masa më të rrepta ndaj personave të përfshirë në akte dhune, vandalizmi dhe trazira publike.
Vendimi vjen pas përplasjeve dhe incidenteve të regjistruara gjatë fundjavës në disa qytete të vendit, veçanërisht në Milano.
Dekreti përfshin ndryshime në trajtimin penal të të miturve, zgjerimin e mundësive për arrestim pas kryerjes së veprave penale, dënime më të rënda për dhunën gjatë protestave dhe masa të reja për kompensimin e dëmeve të shkaktuara. Gjithashtu, në Milano do të dislokohen edhe 500 ushtarë shtesë për forcimin e sigurisë.
Të miturit nga 14 deri në 18 vjeç, me rregulla më të rrepta penale
Një nga ndryshimet kryesore lidhet me përgjegjësinë penale të të miturve. Sipas dekretit, për personat e moshës 14 deri në 18 vjeç do të zbatohet një prezumim i aftësisë për të kuptuar dhe kontrolluar veprimet e tyre.
Kjo do të thotë se ata mund të mbahen penalisht përgjegjës, përveç rasteve kur mbrojtja arrin të provojë se në momentin e kryerjes së veprës nuk kishin aftësinë e nevojshme për të kuptuar ose kontrolluar sjelljen e tyre.
Ndryshimi përmbys rregullin e mëparshëm, sipas të cilit prokuroria duhej të provonte aftësinë e të miturit për të kuptuar veprimet e tij në çdo rast. Për fëmijët nën moshën 14 vjeç, rregullat e përgjegjësisë penale mbeten të ndryshme.
Arrestime edhe pas identifikimit përmes videove
Dekreti zgjeron gjithashtu mundësitë për arrestimin në flagrancë të shtyrë, një procedurë që lejon arrestimin edhe pas momentit të kryerjes së veprës, kur ekzistojnë prova të mjaftueshme për identifikimin e autorit.
Masa do të zbatohet për vepra të tilla si shkatërrimi i pronës, plaçkitja, sulmet ndaj instalimeve të shërbimeve publike, pjesëmarrja e dhunshme në demonstrata dhe dëmtimi i pronës nga grupe personash. Identifikimi mund të mbështetet, për shembull, në pamjet filmike.
Ministri italian i Drejtësisë, Carlo Nordio, bëri të ditur se do të mundësohet edhe angazhimi i menjëhershëm i magjistratëve të nevojshëm për procedurat e vlerësimit të arrestimeve, pa ndjekur procedurën e zakonshme, duke respektuar afatet ligjore.
Kufizime parandaluese edhe jashtë protestave
Masat parandaluese do të zgjerohen edhe për situatat kur nuk ka protesta të organizuara. Autoritetet synojnë të ndërhyjnë ndaj grupeve prej pesë ose më shumë personash që shfaqin sjellje kërcënuese, shqetësuese ose të dhunshme ndaj njerëzve dhe pronës.
Në bazë të ndryshimeve, ndalimet për t’u mbledhur në vende të caktuara mund të zbatohen edhe ndaj personave që shkaktojnë çrregullime të rendit dhe sigurisë publike në zona me fluks të madh njerëzish. Këto masa do të mund të prekin edhe të miturit nga mosha 14 deri në 18 vjeç.
Deri në 12 vjet burg për organizimin e grumbullimeve të dhunshme
Dekreti parashikon krijimin e veprës penale të pjesëmarrjes së dhunshme në demonstrata. Ajo përfshin raste kur grupe prej të paktën pesë personash hedhin gurë, mjete piroteknike ose përdorin shkopinj e sende të tjera të rrezikshme, duke kërcënuar sigurinë publike.
Për këtë vepër parashikohet dënim me burg nga dy deri në pesë vjet, si dhe gjobë administrative deri në 20 mijë euro. Dënimet mund të rëndohen kur autorët fshehin identitetin ose kur veprimet e tyre shkaktojnë të plagosur.
Ndërkohë, organizimi ose nxitja e grumbullimeve të dhunshme, përfshirë përmes internetit dhe mjeteve të komunikimit elektronik, do të dënohet me burgim nga katër deri në 12 vjet.
500 ushtarë shtesë në Milano
Qeveria ka vendosur të forcojë operacionin e sigurisë “Strade Sicure”, duke dërguar 500 ushtarë shtesë në Milano, të paktën deri më 31 dhjetor.
Sipas autoriteteve, trupat do të ndihmojnë në forcimin e pranisë së sigurisë, mbikëqyrjen e objekteve të rëndësishme dhe kontrollin e territorit. Kjo pritet t’u mundësojë policisë dhe karabinierëve të përqendrohen më shumë në parandalimin e krimit, ndërhyrjet dhe ruajtjen e rendit publik.
Megjithatë, nuk u miratua propozimi që do t’u jepte ushtarëve kompetenca të zgjeruara si agjentë të policisë gjyqësore. Ata do të veprojnë në koordinim me forcat e policisë dhe brenda kompetencave përkatëse.
Prindërit do të paguajnë për dëmet e shkaktuara nga fëmijët
Një tjetër masë e re synon përshpejtimin e kompensimit për dëmet e shkaktuara gjatë akteve të dhunës. Kur dëmtohet prona publike, si semaforët apo strehët e stacioneve të autobusëve, prefekti mund të lëshojë urdhër për pagesën e dëmeve.
Në rastet kur dëmtohet prona private, përfshirë dyqanet, vitrinat dhe automjetet e parkuara, pronarët do të mund t’i drejtohen gjykatës për të kërkuar një urdhër pagese me fuqi të menjëhershme ekzekutive.
Dekreti parashikon gjithashtu gjoba nga 500 deri në 1.000 euro për prindërit, kur fëmijët e tyre të mitur shkaktojnë akte dhune ndaj personave ose pronës, edhe në rastet kur i mituri nuk mund të mbahet penalisht përgjegjës. Në rast përsëritjeje, shuma e gjobës do të dyfishohet.
Me këto masa, qeveria italiane synon të forcojë kontrollin e rendit publik dhe të rrisë përgjegjësinë për dëmet e shkaktuara gjatë trazirave dhe demonstratave të dhunshme.
Franca zgjeron ‘shtetrrethimet’ pas protestave, masa të reja në disa qytete
Autoritetet në disa qytete franceze të martën në mbrëmje zgjatën ose vendosën shtetrrethime pas dhunës gjatë protestave të fundjavës, ku Parisi dhe Lioni zgjatën kufizimet ekzistuese ndërsa qyteti i Marsejës e vendosi këtë masë për herë të parë, duke synuar të miturit.
Në Paris, prefektura e policisë e zgjati shtetrrethimin edhe në “Sheshin e Republikës” (Place de la Republique) dhe në disa pjesë të lagjes Les Halles, nga ora 23:00 sipas kohës lokale të së martës deri në orën 06:00 të së mërkurës, raportoi portali i lajmeve “France Info”.
Autoritetet gjithashtu rinovuan ndalimin e të gjitha tubimeve të padeklaruara nga ora 20:00 deri në orën 06:00, duke përfshirë disa zona kyçe të kryeqytetit, përfshirë zonën përreth Pallatit Elysee, Asamblesë Kombëtare, Senatit, bulevardit Champs-Elysees, Chatelet dhe stacioneve kryesore hekurudhore.
Në Lion, shtetrrethimi në qendër të qytetit u zgjat nga ora 21:00 deri në orën 06:00, ndërsa ndalimi i tubimeve do të nisë në orën 16:00, në vend të orës 18:00, dhe do të mbetet në fuqi deri në fillimin e shtetrrethimit.
Ndërkohë, Benoit Payan, kryetari i bashkisë së qytetit bregdetar të Marsejës njoftoi vendosjen e një shtetrrethimi të kufizuar për të miturit, i cili do të hyjë në fuqi nga ora 22:00 e së martës deri në orën 05:00 gjatë ditëve në vijim, në disa pjesë të qendrës së qytetit.
Në Tuluzë, autoritetet njoftuan se shtetrrethimi do të hyjë në fuqi të enjten në mbrëmje dhe do të mbetet në fuqi deri të dielën, nga mesnata deri në orën 05:00. Shtetrrethimet e njoftuara më herët në qytetet Bordo dhe Nicë do të vazhdojnë sipas planit.
Ndërkaq, Liga Profesionale Franceze e Futbollit njoftoi shtyrjen e ndeshjes së së shtunës në Ligue 2 mes Montpellier dhe Red Star të Parisit, pas njoftimit për protesta të reja. Ndeshja, e planifikuar fillimisht për pasditen e së shtunës, është shtyrë për të hënën me kërkesë të autoriteteve.
Rreth 550 mijë persona morën pjesë në 110 demonstrata në të gjithë Francën të shtunën, përfshirë 110 mijë në Paris ndërsa në mbarë vendin u kryen rreth 400 arrestime.
