TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Liqeni i Fierzës vijon të humbasë nivel, ndërsa mungesa e reshjeve gjate veres e prurjeve te kufizuara e kombinuar dhe me shfrytëzimin e rezervës ujore për prodhimin e energjisë elektrike kanë bërë që kuota të zbresë në 266.95 metra mbi nivelin e detit.
Për hidrocentralin e Fierzës, kuotat 240–242 metra mbi nivelin e detit konsiderohen si nivele kritike, të njohura edhe si “pika e vdekjes”, pasi në këto nivele mundësia për shfrytëzimin normal të ujit për prodhimin e energjisë bëhet shumë e kufizuar.
Aktualisht, HEC-i i Fierzës vijon prodhimin e energjisë me një fuqi aktive prej rreth 140 MW. Nga katër agregatet e hidrocentralit, në punë janë dy, ndërsa niveli i ulët i liqenit mbetet një tregues i rëndësishëm për situatën hidrike në kaskadën e Drinit.
Në pikën maksimale të shfrytëzueshme, niveli i liqenit arrin rreth 296 metra mbi nivelin e detit. Në raport me këtë kuotë, niveli aktual prej 266.95 metrash tregon një rënie prej rreth 29 metrash.
Gjatë muajve me reshje të pakta, rezervat ujore të liqenit përdoren gradualisht për të garantuar prodhimin, ndërsa mungesa e prurjeve të reja e vështirëson rikuperimin e nivelit.
Fierza është rezervuari kryesor i kaskadës së Drinit dhe niveli i tij ka rëndësi të drejtpërdrejtë për menaxhimin e prodhimit të energjisë në hidrocentralet e kaskadës. Për këtë arsye, çdo rënie e mëtejshme e kuotës monitorohet me vëmendje, veçanërisht në periudhat kur prurjet natyrore janë të ulëta.
Nëse reshjet vijojnë të mungojnë, niveli i liqenit mund të vazhdojë të bjerë, duke e bërë më të vështirë menaxhimin e rezervës ujore. Nga ana tjetër, reshjet e qëndrueshme do të sillnin rritjen e prurjeve dhe mundësi për rikuperimin gradual të nivelit të Fierzës.
Me kuotën 266.95 metra, liqeni mbetet ende mbi nivelin e konsideruar kritik prej 240–242 metrash, por rënia e vazhdueshme e rezervës ujore e bën situatën një tregues të rëndësishëm të gjendjes hidrike dhe të kapaciteteve të prodhimit të energjisë në vend.
