TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Misioni i NATO-s në Kosovë, KFOR, ka njoftuar për përditësimin e procesit të optimizimit të pranisë së tij në Kosovë, duke theksuar se mandati i misionit mbetet i pandryshuar dhe se siguria e të gjitha komuniteteve vazhdon të jetë prioritet.
KFOR-i thekson se procesi i optimizimit, i paralajmëruar më 12 qershor 2026, po zhvillohet në mënyrë graduale, të koordinuar dhe transparente me institucionet e Kosovës, Bashkimin Evropian, Policinë e Kosovës dhe EULEX-in.
Sipas misionit, procesi mund të kthehet mbrapsht nëse zhvillimet e ardhshme ndikojnë në sigurinë afatgjatë në Kosovë apo në stabilitetin rajonal.
Në kuadër të këtij procesi, kalimi gradual nga prania e përhershme e KFOR-it në Urën mbi Ibër është pjesë e optimizimit më të gjerë dhe, sipas misionit, pasqyron përmirësimin e situatës së sigurisë.
“Vendimet lidhur me praninë e KFOR-it në Urën e Mitrovicës bazohen në vlerësimin tonë të situatës së sigurisë. KFOR-i nuk ka mandat për të përcaktuar nëse ura duhet të hapet apo jo. Këtë duhet ta përcaktojnë BE-ja dhe institucionet përkatëse në Kosovë, pasi KFOR-i të përfundojë praninë e tij në këtë urë”, tha admirali George Wikoff, Komandant i Komandës së Forcave të Përbashkëta të NATO-s në Napoli.
Ndërkohë, komandanti i KFOR-it, gjeneralmajor Okzan Ulutaş, ka theksuar se përkushtimi i misionit ndaj sigurisë së të gjithë qytetarëve në Kosovë mbetet i palëkundur.
“Përkushtimi i KFOR-it për sigurinë e të gjithë njerëzve që jetojnë në Kosovë është i palëkundur”, deklaroi Ulutaş.
Ai shtoi se prania e misionit do të vazhdojë përmes patrullimeve, pikave të vëzhgimit dhe kontakteve me komunitetet lokale.
KFOR do të rrisë praninë në veri
Pavarësisht tërheqjes graduale nga disa pozicione, KFOR-i ka bërë të ditur se prania e tij do të rritet në zona të caktuara, përfshirë pjesën veriore të Kosovës.
Misioni ka sqaruar gjithashtu raportin e tij me Policinë e Kosovës, duke theksuar se zbatimi i ligjit nuk është pjesë e mandatit të KFOR-it.
“Zbatimi i ligjit nuk është pjesë e mandatit të KFOR-it”, thuhet në njoftim.
KFOR-i thekson se vazhdon bashkëpunimin me organizatat e sigurisë në Kosovë, përfshirë Policinë e Kosovës, të cilën e përshkruan si institucionin e ligjshëm vendor të zbatimit të ligjit dhe reaguesin e parë të sigurisë për zbatimin e ligjit civil dhe garantimin e sigurisë publike.
KFOR-i më 10 gusht 2026 njoftoi për tërheqjen graduale të pranisë së përhershme nga Ura e Ibrit. Paralelisht, misioni ka nisur të integrojë gradualisht Policinë e Kosovës në sigurinë e Manastirit të Deçanit.
Sa i përket Urës së Ibrit, KFOR-i rithekson se vendimi për hapjen e saj nuk i takon misionit të NATO-s, por institucioneve përkatëse të Kosovës dhe Bashkimit Evropian, pas përfundimit të pranisë së KFOR-it në atë pikë.
