TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Detaje të reja janë zbardhur nga aksioni i policisë së Lezhës, që çoi në arrestimin e tre personave të armatosur, të cilët lëviznin me një motor të vjedhur në rrugën e vjetër të Lezhës. Sipas të dhënave paraprake, ata dyshohet se po përgatiteshin të kryenin një vrasje ndaj një personi të njohur në zonë.
Të arrestuarit janë Vinçent Piroli, Kristian Ymeri alias Shkambi dhe Elden Tarja. Policia dhe Prokuroria e Lezhës kanë nisur hetimet për veprat penale “Mbajtje pa leje të armëve të zjarrit dhe municionit”, “Sigurimi i kushteve për të kryer vrasje” dhe “Trafikim i mjeteve motorike”.
Ndërkohë, sipas të dhënave të raportuara, interes për çështjen ka shfaqur edhe SPAK, me synimin për të zbardhur lidhjet e mundshme të të arrestuarve me një grup kriminal të dyshuar për kryerjen e vrasjeve me pagesë.
Vrasja dyshohet se ishte planifikuar për mëngjesin e sotëm
Sipas informacioneve paraprake, vrasja dyshohet se ishte planifikuar të kryhej mëngjesin e sotëm. Megjithatë, personat që dyshohet se kishin marrë përsipër realizimin e saj nuk arritën të identifikonin objektivin që kërkonin.
Gjatë lëvizjes me motorin e vjedhur dhe me skafandra në kokë, ata u filmuan nga disa kamera sigurie të instaluara në zonë. Prania e tyre u vu re edhe nga banorët, të cilët njoftuan policinë.
Policia kriminale e Lezhës vlerësoi informacionet e marra dhe organizoi kontrolle në zonë, duke ngritur edhe postoblloqe. Pas bllokimit të zonës dhe ndërhyrjes së efektivëve, u bë i mundur lokalizimi dhe arrestimi i personave që lëviznin me motor.
Gjatë kontrollit, atyre iu gjetën armë zjarri dhe telefona celularë.
Vinçent Piroli, i akuzuar më herët për një vrasje në Mal të Zi
Mes të arrestuarve është edhe Vinçent Piroli, i cili përshkruhet në raportimet mbi çështjen si person me rrezikshmëri të lartë shoqërore, me precedentë të mëparshëm kriminalë dhe i skeduar nga policia si i dyshuar për vrasje me pagesë.
Piroli është akuzuar më herët për një vrasje në Mal të Zi. Në janar të vitit 2022, ai vetë ka qenë shënjestër e një atentati në Shkodër.
Sipas të dhënave të bëra publike, Piroli u arrestua në dalje të Lezhës, teksa lëvizte me një automjet tip “Volkswagen”.
Ndërkohë, në banesën e të arrestuarit Elden Tarja, në Barbullush, si dhe në ambientet përreth saj, u gjetën armë zjarri dhe motori i vjedhur në Suedi.
Policia sekuestroi gjithashtu automjetin “Volkswagen” dhe motorin që dyshohet se është përdorur nga personat e arrestuar.
Dyshime për lidhje me atentatin në Sarandë
Ngjarja ka ngritur dyshime edhe për një lidhje të mundshme të personave të arrestuar me atentatin e rëndë të ndodhur në Sarandë, ku mbeti i vrarë “Tani i Ruzhdiut”.
Sipas të dhënave të raportuara, në të dyja rastet personat kanë vepruar duke përdorur motorë dhe kanë qenë të pajisur me pistoleta.
Megjithatë, lidhja e mundshme mes dy ngjarjeve mbetet për t'u verifikuar nga hetimet e autoriteteve.
