TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Paketa gjithëpërfshirëse, destinacione të reja, shpesh herë edhe oferta konkurruese me destinacionet shqiptare, por mbi të gjitha pushime pa u munduar për të gatuar dhe shërbyer familjes, janë këto arsyet që po i drejtojnë shqiptarët të udhëtojnë më shumë jashtë vendit. Vetëm në gjysmën e parë të vitit udhëtimet janë shtuar me 20 përqind. Ndonëse një pjesë e madhe e shqiptarëve zgjedhin bregdetin shqiptarë, çmimet e larta por dhe turizmi i paorganizuar po i ndryshojnë preferencat e vjetra. Tundimi i ofertave të agjencive turistike për sezonin veror i kanë ndikuar t’i planifikojnë ato që në muajt e parë të vitit.
“10-15% më shumë po preferojnë këto paketa këtë vit. Tamam pushime shkojnë të pushojnë dhe jo pushime të shkojnë nëpër shtëpia e gatuajnë duke marrë paketat all-inclusive i kanë të gjitha të përfshira. Familjet të cilat duan të pushojnë po interesohen më shumë por dhe çiftet më pak individualët”, tha Ervis Kukeli, operator turistik.
Fluksi i shqiptarëve që pushojnë jashtë vendit i ka rritur paketat të cilat përfshijnë akomodimin, ushqimin, argëtimin por dhe turet ditore, deri në 15%. Por sa do të kushtonte një e tillë për një familje mesatare. “Për një familje me dy fëmijë fillon nga 1300-1500 euro një paketë javore të gjitha të përfshira. Destinacionet ekzotike ngelet te 1500-2000 euro çifti. Them se paketat janë rritur nga 10-15% krahasuar me vjet.”, shtoi ai.
Por cilat ishin destinacionet e preferuara të shqiptarëve që i kryen pushimet, por dhe për ata të cilët presin t’i shpenzojnë në vijim. “Antalia ngelet i preferuar, Bodrumi, Greqia. Oferta të mira në Kretë, Rodos me fluturime direkte, Korfuzin. Këto janë kryesoret, pastaj kemi për Spanjë, Itali destinacione ekzotike si Maldive, Dubai, Tajlandë.”, tha operatori. Përfundimi i verës nuk përkthehet me mbylljen pushimeve për shqiptarët, pasi interesi për të udhëtuar jashtë vendit shkon edhe përtej shtatorit.
