TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Tri organizata të njohura mediatike amerikane, CNN, MSNBC dhe “Politico”, planifikojnë të padisin presidentin Donald Trump pas vendimit për t’u ndaluar aksesin në Shtëpinë e Bardhë, njoftuan sot mediet në një deklaratë të përbashkët.
Në deklaratë, të tria organizatat argumentuan se, nëse vendimi nuk kundërshtohet, ndalimi “kërcënon lirinë e shtypit dhe të drejtën e publikut për gazetari të pavarur, të lirë nga ndërhyrjet e qeverisë”.
Ato bënë të ditur se qeveria ishte njoftuar se padia do të depozitohej sot.
Sipas organizatave mediatike, synimi i padisë është të “mbrojnë parimin se qeveria nuk vendos se çfarë raporton apo publikon shtypi”.
Përplasja mes administratës Trump dhe këtyre mediave u përshkallëzua të premten, kur presidenti deklaroi se të tre organizatat ishin përjashtuar menjëherë nga Shtëpia e Bardhë, duke i akuzuar për përhapje të lajmeve të rreme (fake news).
Kritikët e kanë cilësuar këtë veprim si një përpjekje për frikësim dhe si një sulm ndaj lirisë së shtypit. Megjithatë, mbeti e paqartë se çfarë e kishte nxitur saktësisht njoftimin e Trumpit.
Gazetarëve të të tria medieve iu mohua të shtunën hyrja në territorin e Shtëpisë së Bardhë, sipas deklarimeve të organizatave mediatike.
CNN është një nga kanalet më të njohura të lajmeve në botë, ndërsa “Politico” është pjesë e portofolit të grupit mediatik gjerman Axel Springer.
Gjatë mandatit të tij të dytë, presidenti Trump ka ndjekur një qasje gjithnjë e më të ashpër ndaj mediave që nuk i pëlqejnë. Ai shpesh ka kritikuar dhe fyer gazetarë kur nuk i pëlqejnë pyetjet e tyre, ndërsa mbulimi mediatik në favor të tij është vlerësuar publikisht nga presidenti.
