TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Nëntë vende të zonës Schengen kanë vendosur të shtyjnë zbatimin e plotë të sistemit të ri të kontrolleve kufitare, të njohur si EES (Entry/Exit System). Bëhet fjalë për Francën, Belgjikën, Holandën, Gjermaninë, Greqinë, Maltën, Portugalinë, Italinë dhe Zvicrën.
Sistemi i ri synon të zëvendësojë gradualisht vulosjen manuale të pasaportave për shtetasit e vendeve jashtë BE-së dhe të regjistrojë në mënyrë elektronike hyrjet dhe daljet nga zona Schengen. Në kontrollin e parë, udhëtarëve u merren të dhënat e pasaportës, fotografia e fytyrës dhe shenjat e gishtërinjve.
Zbatimi i plotë është shtyrë për shkak të problemeve teknike dhe shqetësimeve për krijimin e radhëve të gjata në aeroporte dhe pika të tjera kufitare. Në disa vende, sistemi ka shkaktuar vonesa të konsiderueshme gjatë periudhës së ngarkuar turistike.
Për momentin, në disa pika kufitare kontrollet biometrike do të vijojnë, ndërsa në raste të tjera autoritetet mund të përdorin procedurat manuale. Pra, udhëtarët mund të përballen ende me kontrollin tradicional të pasaportës dhe, në varësi të pikës kufitare, me regjistrimin biometrik.
EES vlen për shtetasit e vendeve jashtë BE-së që udhëtojnë për qëndrime të shkurtra në zonën Schengen. Sistemi synon të ndihmojë autoritetet të evidentojnë më lehtë tejkalimin e afatit të qëndrimit dhe përdorimin e dokumenteve të falsifikuara.
Për shqiptarët që udhëtojnë drejt vendeve Schengen, ndryshimi kryesor do të jetë regjistrimi biometrik në kufi, ndërsa zbatimi praktik mund të ndryshojë përkohësisht nga një pikë kufitare në tjetrën.
